Vöruúrval og hagstætt verð var ástæðan fyrir því að fjöldi Íslendinga flykktist í búðarferðir til Dyflinnar og Glasgow fyrir jólin. Írska ríkissjónvarpið RTÉ tók viðtal við nokkra íslenska Dyflinnarfara sem komu fyrir jólin árið 1993.
Í myndbandinu má sjá umfjöllun um ferð 103 Íslendinga sem komu fljúgandi með Air Atlanta með galtómar ferðatöskur en troðin seðlaveski í þeim tilgangi að gera kjarakaup á eyjunni grænu.
„Þau koma kannski með eina eða tvær töskur en fara heim með fimm. Það er hins vegar vandamál fyrir rútubílstjórana því á leiðinni heim þarf heila rútu fyrir farangurinn,“ sagði fararstjórinn hjá Samvinnuferðum.
Þúsundir Íslendinga fóru í þessar ferðir, enda var verðlagið aðeins um helmingur af því sem það var heima á Íslandi.
„Sem dæmi þá kostar jakki á herramann 160 pund hérna en 300 pund á Íslandi,“ sagði ein íslensk dama.
Sagt er að ferðirnar sjálfar, það er flugfarið og hótelgisting, kosti fjölskyldu um 2000 pund en Íslendingar telji að þetta borgi sig samt.
Í fréttinni kemur einnig fram að verslunarrekendur í Dyflinni séu ánægðir með að hafa tryggt sér viðskipti Íslendinga. Hörð samkeppni sé um hana, sem og viðskipti annarra Norðurlandabúa, frá öðrum borgum, svo sem Manchester, Newcastle, Lundúnum og París.
„Þetta er fólk sem eyðir mjög miklu,“ sagði Frank McGee ferðamálastjóri Dyflinnar. „Þeir skilja eftir í kringum 1000 pund á mann. Við reiknum með því að þessi viðskipti afli Dyflinni 7 milljón punda.“
