Hasarmyndahetjan Vin Diesel hefur verið lögsóttur af fyrrverandi aðstoðarkonu sinni sem sakar hann um að hafa beitt sig kynferðislegu ofbeldi árið 2010.
Konan heitir Asta Jonasson og segir að atvikið hafi átt sér stað á hótelherbergi í Atlanta en Diesel hafi boðið henni þangað eftir að hann sneri til baka frá næturklúbbi.
Diesel var í fylgd tveggja annarra kvenna en Jonasson segir að eftir að þær fóru hafi leikarinn gripið í báða úlnliði hennar og togað hana niður á rúmið. Hún hafi beðið hann að hætta en hann hafi ekki hlustað á það heldur gripið í brjóst hennar og kysst hana á bringuna.
Jonasson hafði nýlokið námi í kvikmyndaskóla og verið ráðin sem aðstoðarmaður hjá framleiðslufyrirtæki Vin Diesel á meðan kvikmyndin Fast Five, sem hann lék í, var í framleiðslu.
Hennar helstu verkefni voru að skipuleggja veislur og að vera nálægt Diesel þegar hann var ljósmyndaður í návist annarra kvenna en kærustunnar sinnar.
Jonasson segir að þar sem Diesel hafi verið yfirmaður hennar hafi hún ekki viljað neita honum af meiri krafti en Diesel hafi þá haldið ofbeldinu áfram. Hann hafi togað kjól hennar upp að mitti og káfað á henni, meðal annars á innanverðum lærum hennar. Hún segir að hann hafi ýtt henni því næst upp að vegg og reynt að toga nærbuxur hennar niður og sett hönd hennar á lim sinn sem hafi verið í fullri reisn. Hún hafi þá öskrað og hlaupið í átt að baðherberginu.
Diesel hafi þá byrjað að fróa sér en hún hafi þá lokað augunum. Hún hafi verið dauðhrædd en ekki viljað reita yfirmann sinn Hollywood-stjörnuna til reiði.
Hún segir að í kjölfarið hafi henni verið sagt upp störfum en hún hafi aðeins starfað fyrir fyrirtæki Diesel í tvær vikur.
Jonasson segir að Diesel og fyrirtæki hans hafi reynt að hylma yfir atvikið og hún líði enn líkamleg og tilfinningaleg særindi vegna þess.
Jonasson starfar enn í kvikmyndabransanum. Hún undirritaði trúnaðarsamning þegar hún hóf störf hjá framleiðslufyrirtæki Vin Diesel en nýleg lög í Kaliforníu banna að slíkir samningar gildi um kynferðislegt ofbeldi og áreitni. Þess vegna hefur hún höfðað málið á hendur Hollywood-stjörnunni.
Það var New York Post sem greindi frá.
