Skipuleggjendur evrópsku söngvakeppninnar Eurovision, EBU, hafa tilkynnt að Ísrael muni fá að taka þátt í keppninni í vetur þrátt fyrir innrásina á Gasa. Þetta sé keppni sjónvarpsstöðva, ekki ríkisstjórna.
„Eurovision söngvakeppnin er keppni ríkissjónvarpsstöðva um alla Evrópu og Miðausturlanda,“ sagði talsmaður keppninnar við bresku sjónvarpsstöðina ITV. „Þetta er keppni fyrir sjónvarpsstöðvar, ekki ríkisstjórnir, og ísraelska ríkissjónvarpið hefur tekið þátt í keppninni í 50 ár.“
Skipuleggjendur hafa nú farið yfir lista þátttakenda og komist að því að ísraelska ríkissjónvarpið, KAN, uppfylli allar kröfur til að taka þátt í keppninni á næsta ári. En hún er haldin í Malmö í Svíþjóð. Alls taka 37 lönd þátt í keppninni.
Að sögn EBU er þessi ákvörðun tekin í samræmi við ákvarðanir annarra alþjóðlegra stofnana, svo sem íþróttasamtaka sem hafa einnig ákveðið að banna ekki ísraelska keppendur vegna innrásarinnar á Gasa ströndina.
Mesti þrýstingurinn um að banna Ísrael í Eurovision hefur komið frá Íslandi. Ekki frá RÚV heldur frá tónlistarfólki og samtökum tónlistarfólks, meðal annars FTT.
Á mánudag var mótmælt fyrir utan höfuðstöðvar RÚV í Efstaleiti og um 10 þúsund manns hafa skrifað undir undirskriftalista þar sem tekið er undir þá kröfu að Ísland segi sig úr keppninni fái Ísrael að taka þátt.
Vísað er í fordæmi, það er þegar Rússum var vísað úr keppninni eftir innrásina í Úkraínu. Það gerðist eftir hótanir frá Finnum um að draga sig út úr keppninni. Ljóst er af ákvörðun EBU að Ísland hefur ekki sömu vigt og Finnland í Eurovison.
