Gosið hófst með látum á ellefta tímanum í gærkvöldi en í nótt dró nokkuð hratt úr krafti gossins. Engin mannvirki eru í hættu sem stendur og þykir gosið á eins heppilegum stað og hugsast getur miðað við verstu sviðsmyndir.
„Þetta er í óbyggðum og þetta er fallegt og stórfenglegt,“ sagði Ármann í viðtali við RÚV á sjötta tímanum í morgun. Gosið kemur upp í nokkrum samsíða sprungum og segir Ármann að nú fari að myndast aðalgígar á hverri sprungu. „Það dregur hægt og rólega úr því þó það sé ekkert að klárast strax,“ sagði Ármann.
Ármann segir að gosið nú sé gjörólíkt því sem til dæmis varð í Fagradalsfjalli árið 2021. Þá breyttist eðli gossins og hraun tók að renna niður í Meradali. Aðspurður hvort eitthvað sambærilegt gæti gerst nú segist Ármann síður eiga von á því. Mikil kvika hafi komið upp í gærkvöldi þegar gosið byrjaði og þá fellur þrýstingurinn hratt.
„Við komum ekki til með að sjá eins og 2021 þegar sprungan fór að stækka eftir nokkrar vikur. Það sem við sjáum núna verður þveröfugt,“ sagði hann.
Aðspurður sagði Ármann að allt hafi farið eins og best verður á kosið miðað við þær sviðsmyndir sem voru uppi.
„Já, ég myndi halda það. Það var alveg fyrirséð að það væri versti staður að fá þetta upp á þessari sprungu en úr því að það teygir sig svona norðarlega þá getur það bara ekki orðið betra. Þetta er eins gott og hægt er að hugsa sér miðað við að þetta er það versta, skilurðu? Ef maður horfir á þetta jákvæðum augum þá er þetta bara eins gott og hægt er. Allur eldur í óbyggðum.“
Ármann segir að jarðvísindamenn hafi verið farnir að vonast til þess að atburðarásin sem hófst 10. nóvember myndi fjara út.
„Já, þannig séð. Við vorum farin að vonast til þess en menn voru að miða við þessa kenningu Eysteins Tryggvasonar heitins að þegar risið er orðið svipað og það var fyrir 10. og 11. nóvember að þá væri komið krítískt ástand og það stóðst eiginlega.“
Ármann á ekki von á því að eldgosið verði mjög langlíft og það muni jafnvel fjara út fyrir áramót.
„Já, ég held það. Þetta er allt öðruvísi gos en hin þrjú. Þetta er kröftugt gos, mikil kvika að koma upp og þrýstingurinn fellur mjög hratt. Við erum komin í klassískt gos þar sem það rifur sig upp svaka lengja og kvikan kemur mjög hratt út og þá getur það ekki staðið eins lengi.“
