Kristján Einar Sigurbjörnsson, betur þekktur sem Kleini, er nú að reyna að selja forláta Porsche bifreið sem hann gaf unnustu sinni, Hafdísi Björgu Kristjánsdóttur, fyrir aðeins viku síðan. Hún vildi annan bíl.
Vísir greinir frá þessu.
Hinn svarti Porsche jeppi er auglýstur til sölu á síðu manns er kallast Braskara Jói. Verðið er 6 milljónir og 290 þúsund krónum betur.
Í skriflegu svari til Vísis segir Kristján:
„Ég spurði Hafdísi hvað hún vildi í jólagjöf og sendi hún mér mynd af þessum bíl svo ég keypti hann og kom henni á óvart. Hún var í miklu sjokki og þorði ekki að segja mér að þetta væri ekkert bíllinn sem hana langaði í enda sendi hún þetta í einhverju djóki.“
Hann sé nú að bíða eftir að selja þennan bíl og finna svo draumabíl Hafdísar.
TikTok færslan og myndbandið þar sem Kristján gaf Hafdísi téðan Porsche vakti mikla athygli en þetta var fyrsta færsla hans á samfélagsmiðlum í langan tíma.
„Kleinukrækir kom snemma til byggða,“ skrifaði hann í færslunni. Fyrst gaf hann henni Crocs skól en síðan sneri hann henni við og sýndi bílinn.
„Ertu að gefa mér Porsche?!“ spurði hún. Það var greinilega ekki það sem hana langaði í.
