Ökuníðingur sem missti bílprófið ævilangt fyrir löngu síðan hefur verið dæmdur í fjögurra mánaða fangelsi fyrir að keyra bíl. Er þetta í sjötta sinn sem hann er dæmdur fyrir að keyra próflaus en hann á einnig dóma á bakinu fyrir ölvunar og fíkniefnaakstur.
DV greindi frá málinu þann 22. nóvember síðastliðnum. Það er að íbúar í Engjahverfi í Grafarvogi væru uggandi vegna ökuníðings sem ítrekað hafi sest undir stýri þrátt fyrir að vera sviptur ökuréttindum ævilangt.
„Við viljum að maðurinn hætti að keyra. Krakkarnir okkar eru hér úti um allt á rafskútum og að leika sér,“ sagði einn íbúi í hverfinu sem DV talaði við.
Brotasaga mannsins, sem er á fertugsaldri, nær aftur til ársins 2004 en hann hefur í tugi skipta verið tekinn undir áhrifum á bíl. Bæði vegna áfengis og fíkniefnaneyslu. Þá hefur hann einnig verið dæmdur fyrir hraðakstur, vörslu fíkniefna og fjársvik.
Maðurinn hefur verið dæmdur víða um land, svo sem hjá Héraðsdómum Reykjavíkur, Reykjaness, Vestfjarða og Austurlands. Þrátt fyrir að ævilöng svipting ökuréttinda hafi verið áréttuð margsinnis í dómum hefur maðurinn ítrekað haldið áfram að keyra.
Dómurinn sem féll í Héraðsdómi Reykjavíkur miðvikudaginn 13. desember síðastliðinn var sá sjötti þar sem hann var dæmdur fyrir að keyra próflaus.
Maðurinn var handtekinn föstudaginn 27. október í götunni Laufengi þar sem hann býr hjá kærustu sinni. En hann hefur haft aðgang að Volvo jeppa og Skoda skutbíl, og er annar þeirra skráður á tengdaföður hans. Að sögn vitna var fimmtán ára stjúpsonur mannsins í bílnum þegar lögregla kom að.
Eins og í flestum fyrri málum játaði hann brot sín skýlaust og taldi dómari það horfa honum til málsbóta. Hlaut hann eins og áður segir fjögurra mánaða fangelsisdóm, sem er óskilorðsbundinn.
