Jón Guðni Fjóluson var í dag kynntur sem leikmaður Víkings eftir hátt í þrettán ár í atvinnumennsku. Það leggst gríðarlega vel í hann að spila með Íslands- og bikarmeisturunum.

„Þetta er búið að vera undirliggjandi í lengri tíma. Við erum búnir að halda sambandi en nú þegar þetta var on gerðist þetta hratt,“ segir Jón Guðni, sem var einnig orðaður við Víking í fyrra, við 433.is.  „Það var ekki eins nálægt þá og sagt var en Kári heyrði í mér. En ég þurfti að fara í aðra aðgerð þá, sem stoppaði það.“

Jón Guðni kemur frá Hammarby en hann hefur átt erfið tvö ár þar sem hann hefur verið frá vegna meiðsla. Hann hlakkar mikið til að snúa aftur á völlinn.

„Maður getur ekki beðið. Ég er farinn að færast nær vellinum, fara út á völl sjálfur með bolta. Það verður mjög spennandi að komast aftur á völlinn,“ segir Jón Guðni sem kveðst líða mjög vel líkamlega.

Sem fyrr segir var Guðni lengi í atvinnumennsku en Svíþjóð, Noregi, Belgíu og Rússlandi.

„Þetta er búinn að vera góður og langur tími erlendis. Ég er með þrjú börn þannig þetta var spurning um að koma heim eða verða einn eftir í útlöndum einhvers staðar. Eftir að við komum heim í síðustu viku hefur tilfinningin verið mjög góð.“

Þjálfari Víkings, Arnar Gunnlaugsson, hefur verið sterklega orðaður við Norrköping í Svíþjóð og er framtíð hans í óvissu.

„Það eru blendnar tilfinningar í þessu. Auðvitað vill maður að Arnar verði áfram en maður vill líka að íslenskum þjálfurum gangi vel eins og leikmönnum og þeir fái sénsinn erlendis. Ég hef sjálfur verið í Norrköping. Þetta er flottur klúbbur og yrði geggjað skref fyrir hann,“ segir Jón Guðni um það.