Þorsteinn V. Einarsson kynjafræðingur vakti mikla athygli í liðinni viku fyrir hafa gagnrýnt harðlega að Bónus skyldi hafa hafnað því að selja bók hans og eiginkonu hans, Huldu Tölgyes sálfræðings, Þriðja vaktin. Sagði hann starfsmann Bónuss, Ester að nafni, hafa tekið þessa ákvörðun og hvatti fylgjendur sína á samfélagsmiðlum, sem munu vera um 22 þúsund talsins, til að senda Ester tölvupóst, til að fá þessari ákvörðun breytt, en Þorsteinn gaf netfang Esterar upp. Vildi Þorsteinn meina að hugmyndafræðilegar ástæður lægju að baki ákvörðuninni. Í nýrri færslu á Facebook-síðunni Karlmennskan, sem Þorsteinn heldur úti, biður hann Ester hins vegar afsökunar og segist hafa brugðist svona við vegna þess að hann sé karlremba í bata.
Þorsteinn hefur vakið mikla athygli fyrir verkefnið Karlmennskan en það gengur meðal annars út að tala fyrir feminískum gildum og vekja athygli á „neikvæðri karlmennsku.“
Hann er þó umdeildur og hefur bæði hlotið mikinn stuðning og mikla gagnrýni fyrir málflutning sinn.
Í umræddri bók er einkum fjallað um verkaskiptingu á heimilum og hún sögð halla mjög á konur.
Þorsteinn segir á Instagram-síðu sinni að þau hjónin hafi selt yfir 1000 eintök af bókinni.
Þau hafa þó gefið nokkur eintök af bókinni meðal annars fékk Brynjar Níelsson, fyrrverandi alþingismaður eintak, en honum virtist ekki þykja mikið til bókarinnar koma:
Afsökunarbeiðni Þorsteins kemur í kjölfar þess að Guðmundur Marteinsson, framkvæmdastjóri Bónus, sagði í samtali við Vísi að fyritækið hafi takmarkað pláss fyrir bækur í verslunum sínum og þurfi því að velja og hafna. Bókum sem ekki séu í sölu hjá fyrirtækinu sé yfirleitt bara bætt við ef eftirspurn sé eftir þeim frá viðskiptavinum og enginn viðskiptavinur hafi spurt um Þriðju vaktina. Það sé eina ástæðan fyrir því að Bónus hafi hafnað að selja bókina en þar liggi ekki að baki hugmyndafræðilegar ástæður eða andstaða við málflutning Þorsteins eins og Þorsteinn hélt upphaflega fram.
Í afsökunarfærslunni ávarpar Þorsteinn Ester:
„Sannarlega var ég ósáttur við að þú hefðir takmarkaðan áhuga á að selja bók okkar hjóna. Mér þykir leitt að ég hafi blandað þér persónulega inn í þetta ósætti mitt með kallalega yfirlætinu mínu. Það var klárlega rangt að gera þig að skotspóni míns ósættis. Ég hljóp á mig. Sorrí, Ester.“
Hann býður í lok færslunnar Ester ókeypis eintak af bókinni.
Þorsteinn minnir á að þrátt fyrir feminískan málflutning hvíli enn í honum karlremba:
„Þótt ég beiti mér markvisst femínískt og tali um karllægt yfirlæti, tilkall og skaðlega karlmennsku þá er ég í grunninn karlremba. Ég lít á mig sem karlrembu í bataferli. Ferli sem mun vera í gangi út lífið. Innsýn mín í viðfangsefni mín, þriðju vaktina og skaðlega karlmennsku, er minn helsti styrkleiki en á sama tíma veikleiki, sérstaklega þegar ég gæti ekki að mér og vanda mig. Þá á ég það til að kallakallast yfir mig og jafnvel valta yfir fólk. Eins og Ester.“
Mörgum þeirra sem rita athugasemdir við færsluna þykir ekki mikið til þessarar aföskunarbeiðni koma:
„Lélegasta afsökunarbeiðni sem ég hef séð. Sorrí Steini.“
„Glötuð framkoma hjá þér. Þessi yfirbót myndi kalla á falleinkun samkvæmt skilgreiningu þess sem þú þekkir. En þessi hegðun þín lýsir ágætlega hegðun fólks sem telur sig vera á mannúðarvaktinni. Mun ekki kaupa né lesa þessa bók. Gangi þér sem best.“
„Hvað ertu að tala um? Er þetta einhver tilraun til fyndni?“
