Hefði tillagan náð fram að ganga hefði eldra fólk sem hefur enga aðra framfærslu en greiðslur frá Tryggingastofnun fengið 66.381 skatta- og skerðingarlausan jólabónus en Inga hefur bent á að sambærilegur jólabónus sé greiddur til öryrkja.
„Ég á engin orð sem lýsa fyrirlitningu minni gagnvart þessari framkomu stjórnarflokkanna við sárafátækt eldra fólk. Framganga þeirra lýsir engu öðru en stækri mannfyrirlitningu gagnvart sínum minnstu bræðrum og systrum,“ segir Inga í grein sem hún skrifaði og birtist á vef Vísis í morgun.
„Við erum að tala um rúmlega 2000 einstaklinga. Um helmingur þessa fólks fer frá því að vera öryrkjar með aldurstengda örorkuuppbót í það að verða 67 ára og komnir á eftirlaun. Við það missa þau aldurstengdu uppbótina og lækka stórlega í launum. Fara úr því að vera mjög fátækir yfir í það að vera komnir í sárafátækt. Þetta eru að stærstum hluta fullorðnar konur sem eiga engan rétt úr lífeyrissjóði þar sem þær unnu alla sína starfsævi sem heimavinnandi húsmæður,“ segir Inga og setur málið í samhengi.
„Framlagið sem við báðum stjórnarflokkana um (140 millj.) til að geta hjálpað þeim fyrir jólin er svipuð upphæð og þau greiða á rúmum 10 tímum af erlendum skuldum ríkisins. Það var engan bilbug á þeim að finna í atkvæðagreiðslunni þar sem þau kokhraust sögðu NEI!“
Inga birtir mynd af þeim sem greiddu gegn tillögunni eins og hún hafði lofað í annarri grein sem hún skrifaði í vikunni. „Það verður sannarlega eftir því tekið af þjóðinni allri hvernig ráðamenn líta þá sem standa höllustum fæti í samfélaginu. Flokkur fólksins mun sjá til þess að enginn Íslendingur missi af þeirra innsta eðli,“ sagði hún.
