Almar Steinn Atlason listamaður varð landsfrægur árið 2015, fyrir nákvæmlega átta árum, þá 23 ára gamall, sem Almar í kassanum. Gjörningur Almar fólst í því að hann dvaldi nakinn í heila viku í glerkassa i Listaháskólanum.

Almar var þá á sínu fyrsta ári í Listaháskóla Íslands og verkefnið hluti af lokaverkefni hans í námskeiðinu Leiðir og úrvinnsla. Gjörningurinn vakti einnig athygli út fyrir landsteinana og fjölluðu meðal annars Daily Mail, Metro, Huffington Post, Cosmopolitan, Buzz, og Marie Claire um Almar.

Almar hefur nú sett annan „kassa“ á sölu, nánar tiltekið íbúð á efstu hæð á Rauðarárstíg.

Íbúðin er 49 m á efstu hæð í fjölbýlishúsi sem byggt var árið 1946. Ásett verð er 54,5 milljónir króna.

Íbúðin skiptist í eldhús, stofu, tvö svefnherbergi og baðherbergi með þvottaaðstöðu. Þar sem íbúðin er að hluta til undir súð er grunnflötur íbúðar mun stærri en opinber skráning segir til um, eða tæplega 70 fm. Íbúðin er rúmgóð og nýtast öll rými mjög vel.

Nýlega er búið að taka götuna fyrir framan, Rauðarárstíg, í gegn, og framkvæmdir eru við Hlemm, þar sem meðal annars má finna vinsæla mathöll. Til gamans má geta að kvikmyndin Benjamín dúfa var að hluta tekin a leikvellinum sem er í bakgarðinum sem myndast af Rauðarárstíg, Laugavegi og Bríetartúni, en leikvöllurinn gekk í gegnum allsherjar upplyftingu á tökutímabilinu og má sjá eldra útlitið og það nýrra í myndinni sem kom út árið 1995.

Nánari upplýsingar um eignina má finna hér.