Barcelona gleymdi að banna varnarmanninum Eric Garcia að mæta sínu eigin félagi eftir að hafa skrifað undir hjá Girona í sumar.
Xavi, stjóri liðsins, staðfestir þessar fregnir en Garcia hefur undanfarin tvö ár leikið með spænska stórliðinu.
Xavi hafði ekki áhuga á að nota Garcia á þessu tímabili og var hann í kjölfarið lánaður til Girona þar sem hann hefur leikið 12 leiki og skorað eitt mark.
Girona er óvænt að berjast á toppnum í spænsku deildinni en Garcia má spila gegn sínu eigin félagi sem er ekki algengt fyrir leikmenn á láni.
Skiptin tóku mjög stuttan tíma og náði Barcelona ekki að bæta við þeirri klásúlu að Garcia mætti ekki spila gegn eigin félagi.
Þessi tvö lið mætast í kvöld en flautað er til leiks klukkan 20:00.