Carlo Ancelotti, stjóri Real Madrid, hefur grínast með það að hann myndi labba til Sádi Arabíu fyrir sömu laun og golfarinn Jon Rahm er að fá þar í landi.

Rahm hefur skrifað undir samning í Sádi og er útlit fyrir að hann fái nú 450 milljónir punda í árslaun – um er að ræða einn besta golfara heims.

Ancelotti hefur áður verið orðaður við Sádi en líklegt er að hann taki við brasilíska landsliðinu eftir tímabilið.

Ancelotti hefur lengi verið einn fremsti þjálfari heims en hann fær ekki nærrum eins há laun og Rahm í dag.

,,Ég myndi labba þangað. Ég þarf ekki að fá neitt flug, ég skal labba,“ sagði Ancelotti með bros á vör.

,,Augljóslega er það grín en heimurinn er að breytast og mun halda áfram að breytast. John Rahm er mjög góður golfari en ég er enginn sérfræðingur. Hann virðist vera sá besti í heiminum.“