Bjartmar Leósson fékk viðurnefnið Hjólahvíslarinn fyrir nokkru síðan sökum hæfni hans til að finna reiðhjól sem stolið hafði verið víðs vegar um höfuðborgarsvæðið.
Um 14500 meðlimir eru í Facebook-hópi sem hann stofnaði fyrir nokkrum árum, Hjóladót o.fl. – Tapað, fundið eða stolið, og hefur samfélagið ítrekað upp á hjólum sem stolið er og meðlimir lýsa eftir í hópnum. Þó verkefnið snúist aðallega um hjól, þá dettur stundum inn þetta „og fleira„, líkt og fyrir stuttu þegar fyrirtæki hér í bæ greindi frá því að bíl hefði verið stolið frá þeim. Bíll sem var auðmerktur fyrirtækinu.
„Jæja, hér var ég að finna eitt stykki stolinn bíl. Var á leiðinni í 10-11 Hlemmi eftir vinnu og ákvað að kíkja í portið þar fyrir aftan svona í leiðinni, því nýlega fannst stolið hjól þar. Þá blasti þessi við, auðþekktur á merkingunum. Gaman að þessu! „Löggan komin og eigandinn á leiðinni,“ skrifaði Bjartmar í hópinn aðfararnótt þriðjudags.
Segja má að staðurinn sem bíllinn fannst á sé nánast í bakgarði Lögreglunnar á höfuðborgarsvæðinu, eða svona um það bil 100 metrum frá.