David De Gea er sterklega orðaður við Newcastle þessa dagana en strangar reglur ensku úrvaldseildarinnar gætu komið í veg fyrir að félagið fái að semja við hann.
Það er staðarmiðillinn Chronicle sem fjallar um málið.
Nick Pope, aðalmarkvörður Newcastle, verður lengi frá og skoðar félagið því að sækja markvörð.
De Gea er án félags en hann hefur verið það allt frá því samningur hans við Manchester United rann út í sumar.
Reglur úrvalsdeildarinnar segja að ekki megi gera breytingar á leikmannahópum utan félagaskiptaglugga en hann opnar í janúar.
Undantekningar eru gerðar þegar aðeins einn markvörður er til taks hjá liðum. Newcastle hefur hins vegar þá Martin Dubravka, Loris Karius og Mark Gillespie í sínum röðum.
Enska úrvalsdeildin þyrfti því að veita félaginu undanþágu til að fá De Gea.
Það þarf þó að taka annað inn í myndina. De Gea myndi til dæmis biðja um há laun og þá er eiginkona hans ekki sögð spennt fyrir því að flytja aftur til Englands.
Dubravka er án vafa aðalmarkvörður Newcastle um þessar mundir í fjarveru Pope.
