Búnaðarfélag Norður-Þingeyinga hefur miklar áhyggjur af „hressilegum niðurskurði“ Norðurþings til refa og minkaveiði. Sauðfjárbændur verði fyrir búsifjum og ein frægasta laxveiðiá landsins sé í hættu.
Félagið sendi bréf til sveitarstjórnar Norðurþings þann 30. nóvember síðastliðinn. Er þar lýst miklum áhyggjum af breyttri stefnu Norðurþings varðandi meindýraeyðingu á svæðinu.
„Breytingin birtist í því að skorið er hressilega niður fjármagn sem rennur til málaflokksins sem gerir það að verkum að ekki eru fjármunir til til að sinna grenjavinnslu og veiðum á mink,“ segir í bréfinu.
Afleiðingarnar séu þær að ref og mink mun fjölga verulega í sveitarfélaginu með tilheyrandi afleiðingum. Það er að dýrbítar verði til með búsifjum fyrir sauðfjárbændur, að æðarvarp kunni að leggjast af á mörgum jörðum sem hafi verulegar tekjur af því, að veiði í ám og vötnum verði ógnað og að fuglalíf muni gjörbreytast þar sem meindýrin þurfi æti.
Minnt er á að í Norðurþingi séu frægar náttúruperlur með miklu fuglalífi sem og að ein frægasta laxveiðiá landsins er innan marka sveitarfélagsins að hluta, það er Laxá í Aðaldal. Norðurþing hafi einnig tekjur af fasteignasköttum sem lagðir eru á hlunnindi jarða, svo sem æðarhlunnindi og veiði. Þessir skattstofnar rýrni ef hlunnindin verði að engu vegna óhóflegrar fjölgunar refs og minks.
„Það hefur orðið vart við dýrbít á Melrakkasléttu á þessu ári. Einnig hefur minkur valdið tjóni alifuglum í Öxarfirði og Kelduhverfi,“ segir í bréfinu.
Er sveitarstjórn hvött til þess að endurskoða sínar ákvarðanir varðandi meindýraeyðingu betur og vera í fararbroddi á meðal sveitarfélaga við að halda eyðingunni í viðunandi horfi.
Einnig er bent á að það sé mikilvægt að sveitarfélögin hafi samvinnu hvað varðar meindýraeyðingu. Afleitt sé að eitt sveitarfélag dragi lappirnar því þá fjölgi refum og minkum sem virði engin mörk sveitarfélaga og flæði yfir í þau næstu.
„Ríkisvaldið hefur því miður enn minni skilning á þessu máli heldur en sveitarfélögin og því lítilla fjármuna að vænta þaðan sérstaklega ef sveitarfélögin taka ekki alvarlega þá skyldu sína að sinna þessum málum með viðunandi hætti,“ segir í bréfinu.
Norðurþing hefur ákveðið að bjóða refa og minkaveiðimönnum og landeigendum á vinnufund um fyrirkomulag veiðinnar bráðlega. Markmiðið er að skapa vettvang fyrir þá til að koma sínum sjónarmiðum á framfæri og gera tillögu að útfærslu veiðanna.
