Konan var ákærð fyrir að hafa laugardaginn 4. apríl 2020 tekið bifreið í heimildarleysi og ekið henni svipt ökuréttindum og undir áhrifum fíkniefna og slævandi lyfja.
Konan ók bifreiðinni suður Herjólfsgötu í Hafnarfirði og að hringtorgi við Vesturgötu þar sem hún sinnti ekki stöðvunarmerkjum lögreglu sem gefin voru með ljósa- og hljóðbúnaði.
Ók hún meðal annars yfir á öfugan vegarhelming þar til hún missti stjórn á bifreiðinni, ók yfir umferðareyju og síðan á ljósastaur þar sem akstrinum lauk.
Konan játaði brot sín skýlaust fyrir dómi en hún hefur áður komist í kast við lögin fyrir akstur undir áhrifum ávana- og fíkniefna.
Í niðurstöðu héraðsdóms kemur fram að óhóflegur dráttur hafi verið á því að ákæra var gefin út í málinu, en þrú ár liðu frá brotinu þar til ákæra leit dagsins ljós. Er fangelsisdómurinn skilorðsbundinn að öllu leyti og fellur hann niður haldi konan skilorð næstu tvö árin.
Konunni var loks gert að reiða málsvarnarlaun verjanda síns, 180 þúsund krónur og 170 þúsund krónur í annan sakarkostnað.
