Barnsfaðir Eddu Bjarkar Arnardóttur er staddur á Íslandi og freistar þess að hafa á brott héðan af landinu þrjá syni sína og Eddu Bjarkar. Fyrir liggja úrskurðir héraðsdóms og Landsréttar, auk höfnunar Hæstaréttar um að taka málið fyrir, þess efnis að afhenda beri drengina föðurnum, sem er búsettur í Noregi.
Edda Björk situr í gæsluvarðhaldi í Noregi og bíður réttarhalda vegna ákæru fyrir að hafa numið synina á brott úr Noregi og flutt þá hingað til lands.
„Þetta er ekki forsjármál eins og alltaf er verið að skrifa í blöðin, þetta er afhendingarmál sem varðar afhendingu á börnum sem voru tekin með ólöglegum hætti,“ segir Leifur Runólfsson, lögmaður föðurins, í samtali við DV.
„Það er ekkert löglegt í þessu. Núna er móðirin í Noregi og að sjálfsögðu á að skila þessum börnum. Punktur,“ segir Leifur ennfremur.
Aðspurður hvort lagalegar forsendur varðandi afhendingu kunni að hafa breyst eftir brottflutning Eddu Bjarkar frá landinu þá telur Leifur svo ekki vera. „Ég get ekki séð í fljótu bragði að þær hafi breyst en ég er að kanna þetta.“
Aðspurður hvort faðirinn væri í samvinnu við lögreglu um að finna drengina þá segist Leifur ekki vilja tjá sig um það.
