Steve-O var gestur í hlaðvarpsþættinum What‘s Underneath þar sem þetta kom meðal annars fram. Steve-O, sem er 49 ára og heitir réttu nafni Stephen Gilchrist Glover, sló í gegn í Jackass á sínum tíma þar sem hann og félagar hans gerðu allskonar áhættuatriði áhorfendum til skemmtunar.
Það er ekki öllum gefið að halda andlegu jafnvægi þegar komist er á framabraut og segist Steve-O hafa neytt áfengis og eiturlyfja í óhófi framan af.
Ekki nóg með það heldur þjáðist skemmtikrafturinn af mikilli kynlífsfíkn seinna meir og segist hann hafa stundað það að hitta kvenkyns aðdáendur sína til þess eins að stunda með þeim kynlíf og aldrei tala við þær aftur.
Þetta var orðið að svo stóru vandamáli hjá kappanum að hann ákvað að leita sér hjálpar. Það varð til þess að hann stundaði ekkert kynlíf í alls 431 dag, eða þar til hann hitti ástina í lífi sínu.
„Það gekk á ýmsu til að byrja með og það voru ljón í veginum. Það var mælt með skírlífi í 30 til 90 daga en ég endaði á að taka 431 dag af skírlífi. Mitt markmið var að verða maðurinn sem ástin í mínu lífi á skilið,“ sagði hann meðal annars. Hann hefur verið í sambandi með Lux Wright frá árinu 2016 og virðist hann vera kominn á beinu brautina.
„Við fórum á fullt á stefnumótum og fyrsti kossinn kom ekki fyrr en eftir mánuð. Ég sagði henni nákvæmlega hvað ég hefði gengið í gegnum og að árangur minn í samböndum hingað til væri ekki merkilegur. En við gerðum þetta rétt, erum búin að vera saman í sjö ár og ég hef aldrei efast um það í eina sekúndu að hún sé ekki sú rétta fyrir mig.“
Steve-O segist vera mjög stoltur af sjálfum sér og ekki eiga nein leyndarmál lengur. „Ég er stoltur af því hvernig ég lifi lífi mínu í dag og stoltur af því hver ég er orðinn. Ég er endalaust þakklátur fyrir að hafa fundið tilgang lífsins,“ sagði hann að lokum.
