Skemmtikrafturinn og hlaðvarpsstjarnan Hjálmar Örn Jóhannsson var gestur í nýjasta þætti Íþróttavikunnar sem kemur út alla föstudaga. Helgi Fannar Sigurðsson og Hrafnkell Freyr Ágústsson hafa umsjón með þættinum.

Í þættinum var meðal annars rætt um þá ákvörðun UEFA að færa leik Breiðabliks og Maccabi Tel Aviv af Laugardalsvelli og á Kópavogsvöll. KSÍ hafði sett mikla peninga og vinnu í að halda Laugardalsvelli góðum og var hitapulsan góða lögð á flötinn.

Blikar hafa ekki mátt spila á Kópavogsvelli vegna strangra reglna UEFA í keppninni hingað til.

„Miðað við fjöldann sem býr á landinu er erfitt að ætlast til þess að við séum með tíu þúsund manna völl fyrir nokkuð stórt lið á Íslandi. Af hverju er ekki hægt að veita einhverjar undanþágur?“ spurði Hrafnkell í þættinum.

Hjálmar tók til máls.

„Ég tók upp gott grín-myndband af dúknum á Laugardalsvelli. Mér fannst ég helvíti góður. Ég sagði að það væri ekki hægt að spila á þessu, það væri snjór yfir öllum vellinum. Djöfull er lélegt hjá mér að hafa ekki sett það inn. Sex tímum síðar kemur þessi frétt um að leikurinn hafi verið færður,“ sagði Hjálmar léttur í bragði.

Umræðan í heild er hér ofar og þátturinn hér að neðan.