Svarthöfði er sérlegur áhugamaður um hlaðvörp í hvaða mynd sem þau eru. Það eru gósentímar í lífi Svarthöfða um þessar mundir vegna þess að nýlega hafa verið kynntir til sögunnar tveir slíkir sem aðstandendur þeirra segja efnistökin vera „þjóðmálaumræða“.
Annars vegar er það Heimildin sem kynnir þáttinn Pressa og þykir Svarthöfða fara vel á því að sjálft Ríkisútvarpið kynni það framtak til leiks. Það var myndarlega gert í Síðdegisútvarpi rásar 2 í vikunni og ekki nema sjálfsögð þjónusta fyrir skattborgara að stofnunin láti vita hvað ber hæst í fjölmiðlum landsins og á hvað landsmenn eiga að hlusta.
Hins vegar er það Spursmál sem Morgunblaðið ætlar að hleypa af stokkunum á fullveldisdaginn 1. desember og er líklega svar Morgunblaðsmanna við hinum fyrrnefnda. Sá þáttur hefur hins vegar ekki verið kynntur á ríkismiðlinum og má því draga þá ályktun að ekki eigi að hlusta á hann.
Þar sem Svarthöfði er, eins og áður segir, áhugamaður um hlaðvörp ætlar hann samt að gera það.
Þetta vitnar um nýja tíma í fjölmiðlun landsins og óvænt að Morgunblaðið og Heimildin séu að etja kappi á sama velli. Morgunblaðið byggir á fornri frægð og seldist í bílförmum fyrir örfáum áratugum – tugþúsunda vís. Nú hefur það sennilega álíka áskrifendafjölda og Heimildin sem varð til um síðustu áramót.
Það er augljóslega ekki alveg gagnslaust að hafa Ríkisútvarpið með sér í liði og að sama skapi óhentugt að hafa það ekki.