Fjöldi íslenskra atvinnumanna virðist vera að skoða það að koma heim, í Bestu deild karla geta menn fengið vel borgað og það virðist heilla bæði unga og gamla atvinnumenn.

Böðvar Böðvarsson bakvörður Trelleborg er einn þeirra sem skoðar það að koma heim. Hann er orðaður við uppeldisfélag sitt FH en Breiðablik, Valur og Víkingur gætu öll skoðað þann kost að fá Böðvar.

Alex Þór Hauksson miðjumaður Öster er að skoða það að koma heim og er hann orðaður við bæði Stjörnuna og Val.

Aron Bjarnason kantmaður Sirius er að koma heim og er sagður fara í Val en Breiðablik hefur þó mikinn áhuga á Aroni, hann hefur leikið fyrir bæði félög.

Jón Guðni Fjóluson er á heimleið eftir farsælan feril í atvinnumennsku og mun semja við Víking ef ekkert óvænt gerist.

Óli Valur Ómarsson leikmaður Sirius er að skoða heimkomu, hægri bakvörðurinn hefur lítið spilað. Uppeldisfélagið, Stjarnan hefur áhuga en vitað er að Valur skoðar að fá hægri bakvörð.

Valgeir Valgeirsson er að skoða heimkomu en Valur er þar einnig nefnt til sögunnar en sagan segir að Örebro vilji fá meira en tíu milljónir í sinn vasa til að sleppa Valgeiri.

Þá er hinn þrítugi Aron Sigurðarson að skoða heimkomu eftir sjö ár úti. Þessi þrítugi kantmaður Horsens gæti fengið mörg tilboð hér heima.