Stöðva þurfti sölu á bók Omid Scobie, Endgame: Inside the Royal Family and the Monarchy‘s Fight for Survival, í Hollandi í gær. Ástæðan fyrir því var að í hollensku útgáfu bókarinnar var greint frá nöfnum tveggja einstaklinga innan bresku konungsfjölskyldunnar sem áttu að hafa lýst yfir áhyggjum yfir húðlit ófædds sonar Harry Bretaprins og Meghan Markle.
Sjá einnig: Konunglegur rasisti óvart afhjúpaður í hollenskri útgáfu bókar um bresku konungsfjölskylduna
Í gær greindu miðlar um allan heim frá málinu en hvergi komu fram nöfn aðilanna. Sjónvarpsmaðurinn Piers Morgan opinberaði nöfnin í þætti sínum, Piers Morgan Uncensored, í gærkvöldi.
Að hans sögð voru það Karl Bretakonungur og Katrín prinsessa, eiginkona Vilhjálms Bretaprins.
Í lokaútgáfu bókarinnar voru nöfnin fjarlægð vegna meiðyrðalaga, en í nokkrum eintökum af hollensku útgáfu bókarinnar voru fjölskyldumeðlimirnir nefndir.
Piers Morgan sagðist ekki „trúa ekki því að konungsfjölskyldan hafi sýnt kynþáttafordóma“ en honum þætti eðlilegt að samborgarar hans fengu að vita þessar upplýsingar.
„Satt að segja, þá finnst mér að ef Hollendingar geta gengið inn í bókabúð og séð þessi nöfn, þá ættu Bretar hérna, fólk sem borgar fyrir bresku konungsfjölskylduna, það ætti að fá að vita þetta líka,“ sagði hann.
Málið vakti fyrst athygli í mars 2021 þegar Harry og Meghan Markle fóru í viðtal hjá Opruh Winfrey. Þau fullyrtu að fjölskyldumeðlimur hans hefði velt því fyrir sér upphátt „hversu dökk“ húð sonar þeirra, Archie, yrði. Hann fæddist í maí 2019. Fjölmargir brugðust hart við þessum fréttum og sögðu ummælin rasísk.
