Það vekur nokkra athygli að Breiðablik er byrjað að skoða aðra markmenn, er þetta talið vantraust á Anton Ara Einarsson sem er á leið inn í Evrópuleiki með liðinu. Fjallað var um málið í Dr. Football í dag.

Anton Ari hefur varið mark Breiðabliks síðustu ár og oftar en ekki staðið sig vel. Hann eins og margir aðrir í liði Breiðabliks áttu hins vegar ekki sitt besta tímabil í sumar.

Mark Fabricius Jensen, danskur markvörður hjá Start í Noregi var á reynslu hjá Breiðablik á dögunum.

„Hvernig myndi þér líða sem Anton Ari,“ segir Hjörvar Hafliðason stjórnandi Dr. Football í þættinum.

Viktor Unnar Illugason telur að þetta sé ekki góð staða fyrir Anton. „Það væri mjög óþægilegt, að fara inn í stóran Evrópuleik á fimmtudag með þetta yfir sér. Það var aðeins rót á honum í sumar, núna er kominn markvörður á reynslu. Þetta er örugglega drullu óþægilegt, ég held að Anton sé gæi sem þurfi að vita að hann sé númer eitt. Ég held að þetta trufli hann mikið,“ segir Viktor Unnar.

Viktor bendir á að fleiri leikmenn hafi ekki átt gott sumar. „Liðið var lélegt og vörnin og allt, mér er hent í burtu. Vörnin og hafsentar, maður væri alveg pirraður.“

Jóhann Már Helgason telur að Anton horfi svona á hlutina. „Ég held að Anton átti sig á því að eftir þetta tímabil hjá honum, hans framtíð eins og annara í lausu lofti. Hann er þannig kalíber að það vildu mörg lið í deildinni sem myndu vilja fá hann.“