Arndís Anna K. Gunnarsdóttir, þing­kona Pírata, vísar því alfarið á bug að hún hafi dáið áfengisdauða inni á salerni skemmtistaðarins Kíkí áður en hún var hand­tek­in af lög­reglu um helgina. Umræddar fullyrðingar komu fram í frétt á Nútímanum og voru sagðar fengnar frá heimildarmanni innan lögreglunnar.

„Þegar dyraverðir skemmtistaðarins fóru að kanna hvers vegna salernið hafði verið læst í svo langan tíma, þar sem vísa átti gestum út vegna lokunar, komu þeir að þingmanninum og vöktu hann. Arndísi Önnu hefur greinilega brugðið við þetta, eins og hún greinir frá sjálf, og brást hún því hin versta við og þess vegna var kallað eftir aðstoð lögreglu,“ sagði í fréttinni. Þá var vísað í færslu í dagbók lögreglu þar sem sagði að  „dyra­verðir á skemmti­stað í miðbæn­um óska eft­ir aðstoð lög­reglu við að fjar­lægja ofurölvi aðila af staðnum“ og var fullyrt að sú færsla ætti við mál þingkonunnar.

Hún hafi í framhaldinu verið handtekin, flutt á lögreglustöð og aðeins sleppt úr haldi þegar ljóst var að rekstraraðilar skemmtistaðarins ætluðu ekki að leggja fram kæru.

Í samtali við Mbl.is vísar Arndís Anna þessu alfarið á bug. „Þetta er slúður. Hvor­ugt er rétt,“ seg­iir þingkonan og fullyrðir að hún hafi ekki verið að gera neitt sem að komi fólki við inni á salerni staðarins. Hún segist þó ekki vilja tjá sig frekar um málið en vísar í yfirlýsingu sem hún ritaði um helgina.

Málið þykir nokkuð sérstakt en Ragna Árnadóttir, skrifstofustjóri Alþingis, hefur sagt að hana reki ekki minni til þess að þingmaður hafi áður verið handtekinn.