Bandarískir fjölmiðlar hafa greint frá því að Josh Giddey sem leikur með liði Oklahoma City Thunder í NBA-deildinni í körfubolta sæti nú rannsókn deildarinnar. Er hann grunaður um að hafa átt í „óviðeigandi“ sambandi með einstaklingi sem er undir lögaldri. Giddey er sjálfur 21 árs gamall en eins og oft hefur komið fram í fréttum eru ströng viðurlög í Bandaríkjunum við því að fullorðnir einstaklingar eigi í kynferðislegum eða öðrum samskiptum sem þykja óeðlileg við fólk undir 18 ára aldri.

Ekki hefur verið greint nánar frá sambandinu í fréttum. Í fréttum CBS af málinu kemur fram að ásakanirnar í garð Giddey hafi fyrst verið settar opinberlega fram á samfélagsmiðlum síðastliðinn miðvikudag.

Þrátt fyrir rannsóknina lék Giddey með liði sínu í gærkvöldi í tapi gegn liði Philadelphia 76ers.

Mark Daigneault þjálfari Oklahoma City Thunder sagði stöðu Giddey innan liðsins óbreytta út frá körfuboltalegu sjónarmiði. Hann sagði að félagið hefði engar upplýsingar um málið og að rannsóknin væri í höndum yfirstjórnar deildarinnar.

Giddey ræddi við fjölmiðla síðastliðinn föstudag en neitaði að tjá sig um ásakanirnar. Hann sagðist hafa skilning á því að fréttamenn vildu vita meira um málið en hann hefði ekkert að segja á þessu stigi.

Giddey, sem er frá Ástralíu, hefur leikið með liðinu síðan 2021. Á síðustu leiktíð skoraði hann tæplega 16 stig að meðaltali í leik en á yfirstandandi leiktíð er meðaltalið 12 stig í leik.