Myndband sem sýnir harkaleg samskipti listakonu og tveggja vegfarenda við Skólavörðustíg í Reykjavík vegna vegglistaverks til stuðnings Palestínu hefur farið eins og eldur í sinu um netið. Listakonan tók upp samskiptin þegar fólkið vatt sér upp að henni.

„Veistu hvað gerðist þarna fyrir 7. október?“ spyr listakonan í upphafi myndbandsins og á þá við innrás Hamas samtakanna inn á landsvæði Ísraels nálægt Gasa.

„Já, ég er þaðan. Ég er mjög hrædd því að ég veit ekki hvað þú munt gera mér þegar ég sný við þér baki,“ svarar konan sem er augljóslega frá Ísrael. Hún er með karlmanni sem segist einnig vera frá Ísrael en talar íslensku.

Listakonan segir þeim að hún sé að taka myndbandið upp og hann segist vilja fá lögregluna á staðinn.

„Þú ert að skemma þetta,“ segir hann en  hún segist hafa leyfi. Hann dregur það í efa og spyr hver gaf leyfið. „Fjölskylda okkar var drepin,“ segir hann.

@thateastafricanqueenn Everyone go and support the artist shes @juliamaiart 🇮🇸 #iceland #femaleartist #art #icelandictiktok #freepalestine ♬ original sound – aestheticaly.001

Konan segir að veggmyndin sé móðgandi fyrir hana og Íslendinga. „Horfðu á mig. Ég skelf af því að þessi fáni drap fólkið mitt. Drap fjölskyldu mína,“ segir hún og bendir á Palestínufánann.

Listakonan bendir parinu á að Ísraelar hafi drepið 12 þúsund manns en maðurinn segir svo ekki vera. Segir hann hana þá vera að styðja Hamas hreyfinguna með því að mála verkið. „Þetta er Hamas. Þetta er Hamas! Hamas drepur fólk! Reyndu að skilja það bjáninn þinn! Þetta drepur Ísland!,“ öskrar hann. Reynir konan þá að draga hann í burtu sem tekst að lokum.

Verkið er eftir Juliu Mai Linnéa Maria. Í viðtali við Vísi á sunnudag greindi hún frá því að hún hefði fengið mikið áreiti við gerð verksins. Meðal annars að sett hafa verið yfir það ýmis plaggöt til styrktar Ísrael og zíonisma.