Íþróttavikan kemur út alla föstudaga en þeir Helgi Fannar Sigurðsson og Hrafnkell Freyr Ágústsson sjá um þáttinn. Gestur þessa vikuna var sparkspekingurinn og fótboltaþjálfarinn Mikael Nikulásson.

Mikael gerði á dögunum nýjan samning við KFA sem spilar í 2. deild karla. Hann var hársbreidd frá því að koma liðinu upp í Lengjudeildina í haust.

„Þetta er búið að vera lengi í pípunum. Það er hægara sagt en gert að vera með hlutina á hreinu. Þeir voru ekki upp á tíu þegar tímabilið var búið, leikmannalega séð. Það er fullt af hlutum sem þarf að gera utan vallar í fótbolta en þetta snýst aðallega um það að vera með góða leikmenn inni á vellinum. Forsenda þess að ég var til í að halda áfram var að við myndum allavega ekki mæta með slakara lið á næsta ári en á þessu og reyna að gera betur,“ sagði Mikael í þættinum.

„Það er ekki auðvelt að búa til lið á svona stað. Það eru ekki hundrað Íslendingar sem er úr að velja og ef Íslendingur fer er ekki auðvelt að fylla hans skarð með Íslendingi. En þetta lítur mun betur út en það gerði og þess vegna er stefnan að taka þetta bara aftur og gera betur.

Ég er ekkert að gera þetta til að djóka. Leikmannahópurinn og liðið þarf að vera sterkt og allir að róa í sömu átt.“

Umræðan í heild er í spilaranum hér ofar og þátturinn í heild hér neðar.