Íþróttavikan kemur út alla föstudaga en þeir Helgi Fannar Sigurðsson og Hrafnkell Freyr Ágústsson sjá um þáttinn. Gestur þessa vikuna var sparkspekingurinn og fótboltaþjálfarinn Mikael Nikulásson.

Á dögunum kusu ensk úrvalsdeildarfélög gegn því að bann yrði sett við því að lána leikmenn á milli félaga með sömu eigendur. 13 af 20 félögum kusu með banninu en 14 þarf til.

Því má Newcastle, í eigu Sádi-Araba, til að mynda fá leikmenn frá stóru liðunum þar í landi eins og talað hefur verið um með Ruben Neves hjá Al Hilal.

„Ég vil ekki sjá þetta, ég vil að þetta sé bannað. Nú getur Ratcliffe hent bestu leikmönnum Nice í United og mér finnst það skrýtið. Sama ef Ruben Neves fer í Newcastle í janúar, það væri bara eitthvað skrýtið við það,“ sagði Hrafnkell um málið.

Mikael var ekki alveg á sama máli en vill ekki að menn geti átt fleira en eitt félag.

„Mér finnst eiginlega meira spes að menn geti átt í tveimur liðum. Til að koma í veg fyrir þetta áttu ekki að fá að eiga fleiri en tvö lið,“ sagði hann.

„Peningar eru bara að eyðileggja fótboltann. Sama hvort það er þetta eða eitthvað annað. Ef maður byggi ekki á Íslandi heldur á Spáni eða einhvers staðar sem er alltaf sól væri maður bara hættur að horfa á þetta.“

Hrafnkell tók í sama streng.

„Besta dæmið er bara ofborgaðir leikmenn Manchester United.“

Mikael er stuðningsmaður United en er hættur að pirra sig á gengi liðsins.

„Hvernig nenna menn að pirra sig á þessu? Ofborgaðir leikmenn í hverri stöðu og ég og Keli gætum allt eins verið að spila þarna frítt.“

Umræðan í heild er í spilaranum hér ofar og þátturinn í heild er hér neðar.