Samkvæmt Hjörvari Hafliðasyni, þá hefur Arnar Grétarsson þjálfari Vals höfðað mál gegn KA. Snýst málið um greiðslur vegna þess að KA komst inn í Evrópukeppni á síðustu leiktíð.

Arnar stýrði KA á síðustu leiktíð en hætti áður en tímabilið var á enda, hann tók svo við þjálfun Vals og stýrði liðinu á síðustu leiktíð.

„Arnar Grétarsson þjálfari Vals er farin í mál við KA, nú er verið að ræða saman. Málið er sérstakt, Arnar Grétarsson vill Evrópubónus frá KA,“ segir Hjörvar í nýjasta þætti Dr. Football.

Hjörvar segir að KA telji að Arnar eigi að fá bónus en hann vill meira en KA er til í að borga.

„Ég held að KA séu ekki að rífast um það að hann eigi að fá þann bónus en Arnar vill meiri pening af því að þeir fóru tvær umferðir áfram,“ sagði Hjörvar en þá var Hallgrímur Jónasson þjálfari liðsins.

„Ég hef rætt við nokkra formenn í deildinni og fengið þeirra álit, þeir sögðu að þetta væri klaufalegur samningur. Mönnum fannst þetta sérstakt.“

Gunnar Birgisson, fréttamaður á RÚV hafði heyrt af málinu og segir. „Þá heyrði ég þetta þannig, að hann hefði verið með prósentu af Evrópuhagnaði í samningi sínum. Það er þá matsatriði hvort það sé heildin eða fyrir það að komast í Evrópu.“

Hjörvar nefndi þá að mögulega væri ekki gáfulegt hjá þjálfara að fara i málaferli við annað félag, Guðjón Þórðarson hefði unnið mál gegn Grindavík en varla fengið starf eftir það.