Sett hefur verið af stað söfnun á vefnum GoFundMe fyrir bandaríska konu, Stephanie Clevenger, sem veiktist hastarlega skömmu eftir að hún kom til Íslands fyrr í þessum mánuði. Stephanie fékk rúmlega tveggja milljóna króna reikning frá Landspítalanum.

Á söfnunarsíðunni kemur fram að Stephanie hafi verið búin að vera á Íslandi í „5 mínútur“ eins og hún orðar það þegar hún var flutt með sjúkrabíl, sárkvalin, af hótelinu sem hún dvaldi á.

Var með gallsteina og brisbólgu

Rannsóknir leiddu í ljós að Stephanie þjáðist af gallsteinum og brisbólgu (e. pancreatitis) en þekkt er að gallsteinar geta valdið bráðri brisbólgu með tilheyrandi sársauka og kvölum.

Úr varð að Stephanie var lögð inn og skorin upp, en síða hennar á GoFundMe var sett á laggirnar þann 12. nóvember síðastliðinn. Á þeim tíma hafði hún ekki hugmynd um hversu lengi hún þyrfti að dvelja á sjúkrahúsi.

„Ég skammast mín fyrir að biðja um aðstoð en þetta hefur verið algjör martröð,“ sagði hún.

Var nær allt fríið á spítala

Stephanie birti svo uppfærslu þann 16. nóvember en þá var búið að útskrifa hana og hún komin til síns heima. Í færslunni segir hún að það sé erfitt að vera á spítala en að vera á spítala í öðru landi sé hreinlega ógnvekjandi. Hún var því allt fríið sitt, fyrir utan hálfan dag eða svo, á spítala.

Hún segist hafa reiknað með því að Ísland væri líkara Bandaríkjunum en annað hafi komið á daginn. Þannig hafi starfsfólk Landspítalans ekki verið sérstaklega sleipt í ensku.

Stephanie segir að gallblaðran hafi verið fjarlægð nokkrum vikum fyrir Íslandsferðina, en læknirinn hennar heima í Bandaríkjunum gefið grænt ljós á ferðalagið engu að síður. Hún hafi ekki haft hugmynd um að gallsteinar gætu farið í gallganginn og valdið sárum verkjum eins og raunin varð. Læknir hennar heima í Bandaríkjunum hafi svo sagt að þetta væri mjög sjaldgæft en gæti gerst.

Ótryggð og situr í súpunni

Samkvæmt reikningi sem Stephanie birti lá hún inni á Landspítalanum frá 12. nóvember til 14. nóvember og fékk hún reikning upp á tæpar 2,2 milljónir króna. Hún segist hafa ákveðið að greiða inn á reikninginn en þurfi aðstoð við restina, enda 15 þúsund dollarar ekki eitthvað sem maður dregur upp úr veskinu.

Stephanie segir að lokum að tryggingarnar hennar dekki ekki kostnað við sjúkrahúsdvöl erlendis og þá hafi hún ekki keypt sér ferðatryggingu fyrir ferðina. Situr hún því í súpunni. Þegar þetta er skrifað hafa tæplega tvö þúsund dollarar, um 250 þúsund krónur, safnast.

GoFundMe-síða Stephanie.