Saksóknari í Barcelona telur sig geta sakfellt Dani Alves fyrir kynferðisbrot og gæti þessi fyrrum knattspyrnumaður átt yfir höfði sér níu ára fangelsi.

Réttarhöld fara að hefjast en Alves hefur hafnað sök.

Alves var handtekinn í Barcelona í byrjun árs, grunaður um kynferðisbrot á skemmtistað þann 30. desember. Bakvörðurinn hefur neitað sök síðan og sagt að hann hafi stundað kynlíf með meintum þolanda með samþykki þeirra beggja.

Ákveðið var að fangelsa Alves án möguleika á tryggingu en lögfræðingar hans áfrýjuðu. Beiðni þeirra var hafnað.

Alves var tilbúinn, gegn því að hann yrði laus gegn tryggingu, að gefa fram vegabréfið sitt og vera með öklaband. Hann var til í að mæta og gera grein fyrir sér daglega og ekki fara í minna en 500 metra fjarlægð frá heimili eða vinnustað meints þolanda.

Þetta dugði ekki til og var beiðninni hafnað. Í niðurstöðu dómstóls segir að ekki sé hægt að sleppa Alves gegn tryggingu af ótta við að hann reyni að komast til heimalandsins, Brasilíu. Hann sé fjársterkur maður og gæti því tekist það með einum eða öðrum hætti.

Brasilía framselur ekki eigin íbúa þó svo að þeir hafi fengið dóm í öðru landi. Þannig gengur fyrrum knattspyrnumaðurinn Robinho til að mynda laus þar í landi þrátt fyrir að hafa fengið níu ára dóm fyrir hópnauðgun á Ítalíu.

Verði Alves fundinn sekur gæti hann fengið allt að 15 ára dóm samkvæmt spænskum lögum.

Alves er 39 ára gamall og á glæstan feril að baki. Hann hefur unnið alla stærstu titlanna í félagsliðaboltanum og leikið með liðum á borð við Barcelona, Juventus og Paris Saint-Germain