Þetta segir Sigríður María Eyþórsdóttir, tónlistarkona í Grindavík, í aðsendri grein á vef Vísis sem birtist í morgun.
Sigríður María skrifaði pistil í síðustu viku þar sem hún gagnrýndi bankana harðlega fyrir lítinn vilja til að koma til móts við húsnæðiseigendur í Grindavík vegna stöðunnar sem þar er.
Buðust þeir til að frysta fasteignalán íbúa en með því myndu vextir og verðbætur hvers gjalddaga setjast ofan á höfuðstól lánanna þó ekkert þyrfti að greiða af þeim meðan á frystingu stendur.
Eðli málsins samkvæmt eru Grindvíkingar ósáttir við þetta en viðræður standa yfir á milli stjórnvalda og bankana um hvernig málið verður leyst. Í fréttum Stöðvar 2 í gær sagðist Sigurður Ingi Jóhannsson innviðaráðherra reikna með að Grindvíkingar fái einhver svör við lána- og húsnæðismálum sínum.
Sigríður er orðin þreytt á biðinni og í nýjum pistli sem birtist á Vísi í morgun segir hún að allir hafi lagst á eitt við að aðstoða Grindvíkinga, nema lánastofnanir.
„Í þeim hörmungum sem riðið hafa yfir hið áður blómlega og nú brotna samfélag á Suðurnesjum hefur það sýnt sig og sannað að á litlu landi erum við öll eitt. Samtakamátturinn hefur verið aðdáunarverður, ósérhlífni samfélagsins svo alger að við Grindvíkingar stöndum í andakt og eilífri þakkarskuld. Allir hafa lagst á eitt. Nema húsnæðislánastofnanir. Enn hanga þær á fyrra tilboði sínu eins og hundur á beini og til að bæta á skömmina heyrast nú frá fréttamiðlum mjálm úr horni þar sem vælt er um tilgang og ábyrgð fjármálastofnana og takmarkaðar samfélagslegar skyldur í lagalegu samhengi.“
Sigríður bendir á að íbúar séu enn í óvissu rúmri viku eftir alrýmingu Grindavíkur.
„Skilaboðin eru þess efnis að fyrra boð hafi sennilega verið misskilið því, jú, eftir allt saman þá sé þetta nú bara byrjunin, sko.. við skulum bíða og sjá til, við erum að ræða málin og þetta verður örugglega allt bara ókei. Hér þarf að funda, og funda aftur. Þetta þarf að skoða, vega og meta, er þetta það besta fyrir Grindvíkinga í raun? Hvað með skattamálin? Og froðan vellur.“
Sigríður segist velta fyrir sér hver tregðan er.
„Eru lánveitendur svo skelfingu lostnir því þeir sjá fram á hrun bankakerfisins ef lán nokkurra sála úr sjávarþorpi suður með sjó eru fryst og vextir og verðbætur eru gefnir eftir? Ef svo er ætti ekki að vera mikið mál að redda þeim rúðustrikuðu blaði, blýanti og strokleðri. Eða eru bankarnir ef til vill óttaslegnir vegna þess að ”eftirgjöf” af þessu tagi hefur fordæmisgildi og bankastofnanir geti um ófyrirsjáanlega framtíð verið krafðar um að sinna einhverjum óþæginda samfélagslegum skyldum? Það þykir undirritaðri öllu líklegri ástæða. Annars er erfitt að átta sig á þessu, því af einhverri ástæðu sá enginn af bankastjórunum sér fært að mæta til viðtals í sjónvarpinu og svara spurningum eftir fund dagsins. Við heimilislausu og öll hin þurfum því að geta í eyðurnar.“
Hún segir að vandamálin við að hysja upp um sig og taka ákvörðun virðist vera mikil. Af þeim sökum segist Sigríður bjóða fram aðstoð sína.
„Það tekur einn zoomfund fyrir brunch, eina siðferðilega rétta ákvörðun og smá kjarksnefil til að binda enda á þetta ástand og veita Grindvíkingum þann tíma og frið sem er þörf á til að ná áttum, sleikja sárin og verða fær um að taka raunhæfar ákvarðanir um framtíðina, laus við geðshræringu og ótta. Við þurfum ekki meira froðusnakk. Við þurfum aðgerðir- núna. Ég boða Grindvíkinga alla ásamt öðrum húsnæðislánagreiðendum og öllum öðrum sem misbýður yfirlæti og forkastanlegt samfélagslegt sinnuleysi til samstöðufundar við höfuðstöðvar Landsbankans við Hafnartorg, fimmtudaginn 23.nóvember, kl.14.
