Náttfari á Hringbraut telur að Fannar Jónasson, bæjarstjóri í Grindavík, geti endurreist Sjálfstæðisflokkinn í Suðurkjördæmi og gert hann að forystuafli á ný með því að leiða flokkinn í kjördæminu í næstu kosningum. Hann telur að Fannar muni gera góða hluti á þingi og sér hann fyrir sér sem ráðherra.

Undir pistli Náttfara stendur nafn Ólafs Arnarsonar. Hann segir Fannar hafa sýnt enn á ný að hann sé alvöru leiðtogi sem heldur ró sinni við erfiðar aðstæður og falli ekki í þann pytt sem sumir þingmenn og jafnvel ráðherra hafi fallið í með ódýrum upphrópunum og hræsnisfullum yfirlýsingum vegna hamfaranna á Reykjanesi.

„Framkoma Fannars í þeim hamförum sem dunið hafa á Grindvíkingum með þremur eldgosum frá vorinu 2021, og svo þeim náttúruhamförum sem nú standa yfir, hefur vakið verðskuldaða athygli. Hann sýnir fagmennsku og yfirvegun í störfum sínum og virðist vera algerlega laus við þá hvimleiðu athyglissýki sem skín af mörgum ráðherrum og alþingismönnum í fjölmiðlum þessa dagana.“

Ólafur telur einsýnt að kjósendur í kjördæminu muni kalla eftir Fannari inn á Alþingi og sem fyrst í ríkisstjórn. Sár vöntun sé á hæfu fólki á þingi. „Er ekki talað um að u.þ.b. einn þriðji hluti þingmanna geti talist hæfur til að eiga sæti á löggjafarsamkomunni? Fannar Jónasson myndi lyfta meðaltalinu á Alþingi umtalsvert.“

Ólafur rifjar upp að Fannar starfaði fyrir Sjálfstæðisflokkinn á Hellu hér á árum áður og þekki því vel til á Suðurlandi. Þá hafi hann gegnt stöðu bæjarstjóra í Grindavík með sóma á miklum óvissutímum og njóti virðingar um öll Suðurnes. Telur hann einsýnt að Fannar bæri sigur úr bítum í prófkjöri enda njóti hann nú virðingar á landsvísu vegna starfa sinna.

Hann bendir á að fylgi flokksins í Suðurkjördæmi hefur hrunið um þriðjung frá því að Árni Mathiesen leiddi listann þar í þingkosningunum 2007.

„Með Fannar Jónasson í efsta sæti Sjálfstæðisflokksins á Suðurlandi í næstu þingkosningum væri flokkurinn til alls líklegur. Annars ekki.“

Náttfara í heild má lesa hér.