„Góðan daginn. Ég var svo heppinn að vinna 14 milljónir í lottó og ég er búin að velta fyrir mér hvað væri best að gera við þennan pening í sambandi við fjárfestingu fyrir framtíðina. Var að spá hvort ég ætti að nota þennan pening til að borga niður lánið mitt sem stendur í 40 milljónum eða kannski sjá hvort hægt væri að kaupa aðra íbúð og leigja hana út? Hvað mynduð þið gera?
Óhætt er að segja að mörg áhugaverð svör hafi borist og eru ráðleggingarnar misskynsamlegar, eins og gengur og gerist.
Einn segir að viðkomandi hljóti að hafa fengið fría fjármálaráðgjöf og það sé um að gera að nýta sér hana. Flestir segja viðkomandi þó að skynsamlegast sé að greiða niður íbúðalánið.
„Borga niður. Ekki spurning,“ segir einn og annar bætir við: „Borga niður allan daginn. Sparar mikið í vaxtakostnað af 14 milljónum.“ Enn einn bætir við: „Allan daginn lækka skuldir. Þú getur þá heldur leikið þér með peninginn sem annars hefði farið í vexti af þessum 14 milljónum um hver mánaðamót ef því er að skipta.“
Ýmsir eru þó þeirrar skoðunar að það gæti borgað sig að kaupa íbúð eða jafnvel láta peninginn ávaxta sig í banka enda vextir háir um þessar mundir. „Láta helming inn á lán. Stofna Indò og sparnaðarreikning þar sem er með 8% vexti og rest þar inn. Bara þú tekur ákvörðun sem hentar þér og þínum fjárhag best,“ segir einn.
Svo eru þeir sem vilja að lottóvinningshafinn heppni njóti lífsins um fram allt. „Ég myndi fara á ógleymanlegt skrall í Asíu. Lifir bara einu sinni.“
Hvað myndir þú gera ef þú ynnir 14 milljónir í lottóinu?
