Í þættinum opnar Margrét sig um einelti sem hún varð fyrir í æsku, hvernig það mótaði hana og hvaða áhrif það hafði á sjálfsmynd hennar.
Hún rifjar upp fyrsta skóladaginn sem er henni enn mjög minnisstæður. „Ég var ótrúlega spennt að byrja í skóla, en þekkti engan,“ segir hún. Fjölskyldan var þá nýflutt í Grafarvoginn.
„Ég man ótrúlega vel eftir morgninum áður en ég fór í skólann. Ég man í hvaða fötum ég var, hvernig skólataskan mín var, hvernig hárið mitt var og hvað ég var ótrúlega spennt að eignast nýja vini. Ég var búin að sjá fyrir mér að þetta yrði svo skemmtilegt, en svo var það ekki þannig.“
Fyrsti skóladagurinn var upphafið að einelti sem hún þurfti að þola í næstum áratug.
„Mér var mikið strítt fyrir að vera með rautt hár, hvíta húð og freknur,“ segir hún.
Margrét fékk þau skilaboð frá jafnöldrum sínum að það væri eitthvað rangt við hana. Hún fékk að heyra það daglega í mörg ár og byrjaði sjálf að trúa því. Þegar hún komst á kynþroskaaldur þyngdist hún og þá ágerðist eineltið. Það var ekki fyrr en hún uppgötvaði að hún gæti breytt sér til að fá samþykki skólafélaganna. Hún byrjaði að lita á sér hárið, setja á sig brúnkukrem, svelta sig og drekka áfengi til að passa í hópinn. Með árunum þróaði hún með sér grimma átröskun og síðar áfengisvanda sem fylgdi henni út nær allan þrítugsaldurinn.
Fyrir rúmlega fimm árum síðan sneri hún við blaðinu og er í dag heilsuhraust tveggja barna móðir og nýgift ástinni sinni. Hún ræðir nánar um eineltið í spilaranum hér að ofan.
Í þættinum, sem má horfa á hér, segir hún frá átröskuninni, áfengisvandanum og bataferlinu. Þú getur einnig hlustað á Fókus á Spotify.
Fylgstu með Margréti á Instagram.
