Hörður Magnússon var nokkuð ómyrkur í máli sínu varðandi stöðu íslenska landsliðsins í fótbolta sem mætir Slóvakíu í kvöld.

Hörður telur að Age Hareide hafi lítið sannað sem þjálfari hjá liðinu til að fá það lof sem hann hefur fengið.

„Ég sé okkur ekki ná í sigur. Kannski jafntefli. Mér finnst Slóvakarnir betri en við. Við erum ennþá í öldudal og það hefur lítið breyst með nýjum þjálfara,“ sagði Hörður Magnússon í íþróttafréttum RÚV í gærkvöldi.

Rætt hefur verið um að KSÍ reyni að framlengja samning Hareide sem rennur út á næsta ári, Hörður telur hann ekki hafa unnið fyrir honum.

„Ég hefði viljað sjá meira. Við höfum nánast geta valið úr öllum okkar leikmönnum öfugt við fyrri landsliðsþjálfara. Ég sé ekki alveg hvað hann er að reyna að láta okkur spila. Við eigum í vandræðum með að skora, nema á móti Liechtenstein. Ég vil bara sjá miklu meira. Það er enginn vafi á því að Åge Hareide er fær þjálfari og gríðarlega reynslumikill. En það stefnir í að við lendum í fimmta sæti í þessum riðli sem er ekki ásættanlegt að mínu mati. Ef það á að verðlauna hann með nýjum samningi þá finnst mér að árangurinn þurfi að vera betri,“ segir Hörður á RÚV.

Íslenska liðið fer að öllum líkindum í umspil um laust sæti á EM í mars en þar sér Hörður ekki mikla möguleika.

„Mér finnst það full digurbarkalegt að segja það. Jú, hann er með sjálfstraust og bjartsýni og það er ekkert að því. En ég tel ennþá einhver ár í að við förum að berjast um að komast á stórmót, að mínu mati. Ég veit að ég er kannski pínu svartsýnn en ég er raunsær.“