Borghildur Fjóla Kristjánsdóttir er starfandi formaður slysavarnafélagsins Landsbjargar og verður það næstu vikurnar.

Borghildur er í björgunarsveitinni Gerpi í Neskaupstað og Ársæli í Reykjavík. Hún hefur setið í stjórn Landsbjargar síðan 2019, þar af sem varaformaður síðustu þrjú ár.

Í tilkynningu frá Landsbjörg er haft eftir Borghildi að henni sé ljúft og skylt að taka við boltanum eftir að fyrrum formaður, Otti Rafn Sigmarsson, ákvað að stíga til hliðar til að einbeita sér að heimabyggð sinni, Grindavík, sem á um sárt að binda.

Sjá einnig: Otti stígur til hliðar sem formaður Slysavarnafélagsins Landsbjargar

„Í ljósi aðstæðna síðustu daga er sú ákvörðun Otta Rafns Sigmarssonar að stíga tímabundið til hliðar sem formaður, virðingarverð og skiljanleg enda þarf hann rými til að sinna sinni fjölskyldu og nærumhverfi og óska ég honum alls hins besta í þeim krefjandi verkefnum sem framundan eru.

Mér er ljúft og skylt að taka við þessum bolta, enda margir þræðir hjá félaginu og mikilvægt að halda fókus. Stjórn félagsins er öflug og munum við vinna að þessu verkefni, sem og öðrum, saman sem ein heild líkt og endranær, ásamt einvala liði björgunarsveitarfólks og starfsfólks.

Okkur Íslendingum er ljóst er að framundan eru ærin verkefni í Grindavík, hvað sem framtíðin ber í skauti sér þar og eru félagar okkar tilbúin, nú eins og endranær, að bregðast við ef á þarf að halda. Stjórn Slysavarnafélagsins Landsbjargar sendir Grindvíkingum okkar bestu kveðjur og hlýjug.“