Marcel Marek er einn af íbúum Grindavíkur sem yfirgaf heimili sitt á föstudag með fáar eigur sínar. Nóttina á eftir var brotist inn í bíl hans þar sem hann stóð á bílastæði við hús vinar hans þar sem Marcel hafði fengið gististað og hluta af eigum hans rænt, það mikilvægasta er vegabréfið. 

„Síðustu nótt var brotist inn í bílinn minn og hluta af eigum mínum stolið. Ég var með nokkuð af dóti þar sem ég gisti hjá vini mínum vegna þess að þurfti að rýma Grindavík. Það mikilvægasta sem var stolið er vegabréfið mitt, ef einhver er með það þá býð ég fundarlaun fyrir. Það myndi kosta mig háar fjárhæðir að fara til Tékklands til að fá nýtt vegabréf útgefið,“ segir Marcel í færslu á Facebook. 

Í samtali við DV segir Marcel að hann hafi selt húsið sitt við Víkurbraut í Grindavík kl. 10 á föstudagsmorgun. „Hugmyndin hjá mér var að kaupa íbúð af því það var erfitt að reka heilt hús,“ segir Marcel sem hefur verið búsettur í Grindavík í þrjú ár og starfar hjá Vélsmiðju Grindavíkur. 

„Svo um kvöldið varð allt klikkað. Þannig að ég tók köttinn mitt og mikilvægustu eigur mínar, setti í bílinn og keyrði til vinar míns í Reykjavík. Það var allt mjög kaótískt, íbúð vinar míns er lítil og ég skildi dót eftir í bílnum. Ég er alveg í áfalli af því mér datt ekki einu sinni í hug að einhver myndi stela dótinu mínu úr bílnum.“

Segir hann að svo virðist sem þjófurinn hafi reynt að ræna bílnum líka, þar sem vírar lágu út úr svissinum og það hafi verið erfitt að koma lyklinum í og starta bílnum. „Það var mjög erfitt að koma lyklinum í svissinn, og virðist sem einhver hafi reynt að nota skrúfjárn eða annað verkfæri til að koma honum í gang.“ Bíllinn stóð á bílastæðinu við Austurbrún 4 frá kl. 22 á föstudagskvöld til 7.30 á laugardagsmorgun og var brotist inn í bílinn á þeim tíma. 

„Kreditkortinu mínu var stolið, 30.000 krónum í pening, og nokkrum smærri hlutum. Vegabréfið er það mikilvægasta samt,“ segir Marcel, sem er þegar búinn að tilkynna þjófnaðinn til lögreglunnar.

Bjartmar Leósson hjólahvíslari vakti athygli á þjófnaðinum í hópnum Hjóladót o.f. – Tapað, fundi eða stolið. „Þetta er það síðasta sem fólk þarf þegar það er nýflúið frá Grindavík!“

Marcel þiggur allar ábendingar um vegabréf sitt og aðrar eigur og má senda honum skilaboð á Facebook.