Konan sem nú situr í gæsluvarðhaldi vegna gruns um að hafa orðið sambýlismanni sínum að bana í Bátavogi í september síðastliðnum sakaði manninn um að hafa eitrað fyrir smáhundi hennar sem var af tegundinni Chihuahua. Hundurinn fannst dauður í frystihólfi í ísskáp í íbúðinni.

Nútíminn greindi frá þessu í morgun.

Maðurinn, sem var á sextugsaldri, fannst látinn laugardaginn 23. september og hefur málið verið rannsakað sem manndráp. Var greint frá því í fréttum í byrjun október að hinn látni hafi verið með áverka á hálsi og kynfærum. Þá var staðfest að smáhundur hefði fundist dauður í íbúðinni.

Í frétt Nútímans kemur fram að konan hafi haldið því fram sama kvöld og hún var handtekinn að hinn látni hafi eitrað fyrir hundinum. Er hún sögð hafa haldið því fram að maðurinn hafi blandað einhvers konar eitri í drykkjarskál hundsins með þeim afleiðingum að hann dó.

„Hún sagðist handviss um það að maðurinn hefði drepið þessa tík og var í raun í miklu uppnámi vegna þess. Hún var ekkert að kippa sér upp við það að sambýlismaðurinn hennar hafði skömmu áður látið lífið. Hún talaði bara um þennan hund sem hún sýndi okkur í frystinum,“ hefur Nútíminn eftir einum af heimildarmönnum sínum.

Nútíminn hefur eftir Grími Grímssyni, yfirlögregluþjóni hjá lögreglunni á höfuðborgarsvæðinu, að örlög smáhundsins séu á meðal þess sem er nú er rannsakað. Þá hafi lögregla í rannsókn sinni rætt við á þriðja tug einstaklinga.

DV ræddi við Ævar Pálma Pálmason, aðstoðaryfirlögregluþjón hjá Lögreglunni á höfuðborgarsvæðinu, þann 18. október síðastliðinn. „Rannsóknin gengur út á að þarna hafi verið um manndráp að ræða og það er aðeins ein manneskja sem er grunuð, sú sem er í gæsluvarðhaldi.“

Umfjöllun Nútímans.