Um miðjan júlí í sumar greindi DV frá máli eiginmannanna Ólíver Steinar Mikulcik Jensson og Ryan David Mikulcik, sem báðir störfuðu áður hjá Airport Associates á Keflavíkurflugvelli.
Ryan hóf störf þar í desember árið 2022 eftir að hafa flutt til Íslands frá Bandaríkjunum, en þá hafði Ólíver starfað þar í tæp sjö ár. Líkaði þeim báðum starfið vel, fannst frábært að vinna saman og geta átt frí saman, og voru þeir vel liðnir af samstarfsfélögum og viðskiptavinum.
Eins og rakið er í fyrri frétt DV þá breyttist andrúmsloftið á vinnustaðnum í aðdraganda fundar sem vera átti milli Airport Associates og stéttarfélagsins VR. Fór svo að deildarstjóri kallaði Ryan á fund sinn og tilkynnti honum að ráðningarsamningur við hann yrði ekki endurnýjaður. Ákvað Ólíver í kjölfarið að segja starfi sínu lausu, bæði vegna þess að hann hafði engan áhuga að vinna hjá fyrirtæki sem kemur svona fram og einnig til að standa með maka sínum
Nokkrum dögum seinna sóttu þeir báðir um vinnu hjá Icelandair og var Ólíver boðið starf, en ekki Ryan. Var þeim greint frá að það væri vegna ummæla fyrri vinnuveitanda um Ryan, ummæli sem komu fram áður en þeir sóttu um nýja starfið, frá fyrrum yfirmanni sem ekki var meðmælandi í umsóknum þeirra.
Sögðust þeir vilja stíga fram með reynslu sína þar sem um væri að ræða „hegðun sem þarf að stoppa og þetta á ekki að líða hjá neinum fyrirtækjum.“
Í gær, fimmtudag, greindi Ólíver frá því sem gerst hefur í málinu síðan í sumar. Segir hann að sannleikurinn sé ekki að sigra í málinu, þar sem yfirmenn Airport Associates og Icelandair gangist ekki við að hafa látið orð sín falla.
„Smá update af málinu okkar Ryan við Airport Associates. Það er greinilegt að orð gegn orði á milli yfirmanna hjá Airport Associates, Icelandair og VR vinni sigurinn heldur en sannleikurinn sjálfur.
APA hefur neitað hreinlega fyrir það að hafa farið yfir til Icelandair og rætt um Ryan. Nú neitar svo deildarstjóri Icelandair því líka að þau hafi sagt að hann hafi fengið margar aðvaranir. Þrátt fyrir það að hún hafi sagt það við Ryan í persónu í atvinnuviðtali sem honum var boðið í. Svo segir hún við hann að það væri ein af þeim ástæðum af hverju hún vildi ekki ráða hann í vinnu,“ segir Ólíver.
„Skil ekki hvað gengur á í hausnum á svona manneskju að segja eitt við viðkomandi og annað við lögfræðinga og stéttarfélög.“
Segir Ólíver að það sé greinilega ekki nógu mikil sönnun fyrir stéttarfélögin eða lögfræðinga að VR hafi fengið símtal frá deildarstjóra Icelandair þar sem hann játar að hafa sagt framangreint við Ryan og það sé heldur ekki nóg að þeir séu einnig með ofangreint skriflegt í tölvupósti frá deildarstjóra Icelandair.
„Við værum ekki búnir að standa í öllu þessu mánuðum saman að berjast fyrir okkar réttlæti ef þetta væri ekki satt. Átt viðtöl við lögfræðinga og bókstaflega brotnað niður fyrir framan þá. Út af þetta er búið að vera svo sárt og óréttlát framkoma við okkur.“
Ryan fékk einnig staðfestingu í tölvupósti frá APA sem einnig var send til VR að það hafi aldrei verið nein aðvörun skráð um Ryan.
Segir Ólíver að daginn eftir að hann birti færslu um málið í sumar, 18. júlí, hafi deildarstjóri Airport Associates mætt með köku handa öllum starfsmönnum og látið eins og ekkert hafi gengið á.
„Ég get alveg sagt ykkur það, þegar ég byrjaði að starfa hjá Aiport Associates árið 2016 þá var núverandi deildarstjóri APA í sömu starfsstöðu og ég var í, kvartaði hún jafn mikið og aðrir varðandi laun og fleira,“ segir Ólíver.
„Við vorum svo góðir vinir, vorum oft saman á brottförum í vinnunni. Kíktum oft út í bjór með vinnuhópnum, einnig gerði ég brúðargreiðsluna hennar. Svo náttúrulega breytist auðvitað allt saman þegar maður er kominn í yfirmannsstöðu og setur sjálfa sig á háan stól.
Þannig þið getið rétt ímyndað ykkur, hversu miklu sjokki ég var í vegna framkomu hennar við eiginmanninn minn og mig líka.“
Með færslu sinni á Facebook birtir Ólíver skjáskot: „Með staðfest svar á því sem var sagt við okkur frá Icelandair sem er greinilega ekki nógu mikil sönnun fyrir VR og viðbrögð fyrrum starfsmanna vegna framkomu fyrrum yfirmanna. Svona hegðun þarf að stoppa og þetta á ekki að líða hjá neinum fyrirtækjum.“
