Bruno Fernandes, fyrirliði Manchester United, viðurkenndi eftir tapið gegn FC Kaupmannahöfn í gær að andinn í hópnum væri ekki sem bestur.
United komst 0-2 yfir í gær en leikurinn breyttist við afar umdeilt rautt spjald sem Marcus Rashford fékk seint í fyrri hálfleik og fór FCK að lokum með 4-3 sigur. Enska liðið er á botni síns riðils í Meistaradeildinni eftir úrslitin.
„Þetta eru mikil vonbrigði. Við hefðum átt að fá eitthvað út úr þessu,“ sagði Fernandes eftir leik.
„Þetta eru erfiðir tímar og andinn er ekki sem bestur því við lögðum hart að okkur tíu gegn ellefu og ákvarðanir fóru gegn okkur.“
United er nú með bakið upp við vegg í riðli sínum og á eftir að mæta Galatasaray og Bayern Munchen.
„Fyrir leik ætluðum við að vinna síðustu þrjá leiki riðilsins og nú þurfum við að vinna síðustu tvo ef við viljum vera áfram í Meistaradeildinni og spila gegn bestu liðunum,“ sagði Fernandes.
