Maðurinn, sem kemur fram nafnlaus og verður hér eftir kallaður X, segir sögu sína í nýjasta þætti af Lífið á biðlista. Gunnar Ingi kom af stað samnefndu átaki fyrir stuttu og er þetta fimmta viðtalið í herferð hans gegn löngum biðlistum í meðferð og afvötnun.
Sjá einnig: Íslensk kona seldi sig til að fjármagna neysluna – „Ég hefði selt ömmu mína“
Gunnar hefur stofnað Facebook-hópinn Lífið á biðlista – Reynslusögur, þar sem bæði fólk með fíknisjúkdóm og aðstandendur geta sagt sögu sína nafnlaust og reynslu þeirra af biðlistum.
X segist ekki hafa hugmynd um hvernig hann sé enn lifandi vegna óhóflegrar áfengisneyslu, hann drekkur nokkra lítra af víni á dag. Hann viðurkennir að hann hafi drukkið tvo lítra áður en viðtalið byrjaði, sem var um hádegi á virkum degi.
Hann byrjaði ungur að finna fyrir kvíða og leitaði sér hjálpar hjá geðlæknum en segir að það eina sem þeir gerðu var að setja hann á geðlyf sem annað hvort juku vanlíðanina eða héldu honum sofandi allan daginn.
„Þeir voru bara að deyfa mig,“ segir hann. „Sofðu bara frekar en að vera svona,“ voru skilaboðin sem honum fannst hann hafa fengið frá fagaðilum.
Allt breyttist þegar hann drakk áfengi í fyrsta skipti, þá loksins hvarf kvíðinn. Hann hafði ekki hugmynd um hvaða áhrif þetta nýja meðal myndi hafa á líf hans.
X segir að hann myndi ekki óska sínum versta óvin að upplifa sekúndu af því sem hann hefur upplifað síðastliðinn mánuð. Hann komst loksins inn á Vog fyrir stuttu eftir níu mánaða bið. En hann var þá í miklu geðrofi og hljóp fljótlega út í ofsakvíðakasti.
X sakar SÁÁ um að taka ekki nógu mikið mark á fólki sem kemur inn sem er mjög andlega veikt. Hann segist hafa hringt í SÁÁ og grátbeðið um að fá að koma aftur. „Ég gerði mistök,“ sagði hann.
Honum var neitað um aðra innlögn strax og fékk stað þess viðtalstíma hjá ráðgjafa eftir þrjár vikur. Hann segist hafa endaði í gistiskýlinu þar sem ungur maður lést í fanginu hans úr ofneyslu.
Gunnar Ingi segir að hann hafi reynt að hjálpa X eftir að hafa fengið símtal frá honum. „Ég tók hann inn á heimilið mitt í þrjá daga, gaf honum mat og hreint rúm til að sofa í og reyndi mitt besta til að koma honum inn einhversstaðar, án árangurs,“ segir hann og bætir við að núna sé hann aftur kominn í gistiskýlið.
X segir að í hvert skipti sem hann fer að sofa vonast hann til þess að vakna ekki aftur. Honum líður ekki vel í gistiskýlinu og segir að meirihluti þeirra sem eru þar séu í geðrofi, sprautuneyslu og allir á biðlista. Hann tekur það fram að starfsfólkið á gistiskýlinu sé yndislegasta fólk í heimi en að hans mati ætti enginn að þurfa búa við þetta.
X segist dreyma um að mæta á tólf spora fund, standa í pontu og segja nafnið sitt og að hann sé búinn að vera edrú í eitt ár. Hann dreymir um að vera til staðar fyrir fjölskyldu og vini, en því miður hafa flestir vinir hans látið lífið. Bara á síðustu fjórum mánuðum hefur hann misst fjóra vini.
Hann segist sjá fram á að þurfa að bíða aftur í níu mánuði eftir að komast aftur inn á Vog. „Ég er ekki viss um hvort ég verði á lífi þá,“ segir hann.
Horfðu á allt viðtalið hér að neðan.
