Tveir ungir menn sem hafa, að þeirra sögn, verið ranglega sagðir hluti af svokölluðum Latínó-hóp, segja rangt að þeir hafi tengsl við Gabríel Duane Boam, sem varð fyrir skotárás Við Silfratjörn í Úlfarsárdal í síðustu viku.

Segja þeir að engin tengsl séu á milli Bankastræti Club málsins og árásarinnar á Gabríels.

Beðist er afsökunar á á fullyrðingum um þetta í fyrri frétt DV um málið.

Mannlíf og DV greindu frá því í gær að Gabríel væri sá sem varð fyrir árásinni. Einnig var sagt frá því að hann væri hluti af Latínó-hópnum. Ungu mennirnir segja það alrangt og það sé í raun einnig rangt að til sé einhver Latínó-hópur, þeir eigi stóran vinahóp manna með alls konar bakgrunn, þar á meðal íslenskan, pólskan, s-amerískan og afrískan.

„Ég er ekki latínó, ég er Íslendingur,“ segir annar mannanna í samtali við DV, en hann talar reiprennandi íslensku og er fæddur á Íslandi.

Báðir mennirnir eru á meðal þeirra sem urðu fyrir árás er hópur manna ruddist inn á Bankastræti Club kvöld eitt haustið 2022 og gekk þar berserksgang. Mennirnir segja hvimleitt að þeir, sem voru þolendur í þessari árás, séu sífellt dregnir fram í dagsljósið í fréttaflutningi og sagðir hluti af einhverjum hópi sem er ekki til.

„Maður er bara að reyna að halda áfram með líf sitt og það er þreytandi að vera tengdur við eitthvað sem kemur manni ekki við,“ segir hinn maðurinn. Þeir segja kynþáttafordóma spila inn í.

Mennirnir ítreka að skotárásin á Gabriel Duane hafi ekkert að gera með hópárásina inni á Bankastræti Club haustið 2022. Engin tengsl séu þar á milli.