Mail Online segir frá því að Karl hafi boðið til veislu sem verður haldin í Clarence house, aðsetri Karls og eiginkonu hans, Kamillu, í Lundúnum á afmælisdaginn. Nánusta fjölskylda og vinir eru sagðir hafa fengið boðskort en Harry og Meghan virðast ekki vera á gestalistanum þetta árið.
The Sunday Times greindi frá því á dögunum að Harry hafi fengið boð en ákveðið að vera frekar heima hjá sér í Kaliforníu. Talsmaður hjónanna segir við Mail Online að Harry og Meghan hafi ekki fengið boð og ekki haft hugmynd um fyrirhugaða afmælisveislu.
Haft er eftir heimildarmanni úr innsta hring að Harry og Meghan hafi ekki haft vitneskju um fyrirhugaða afmælisveislu fyrr en fréttin birtist í The Sunday Times. Heimildarmaðurinn segist þó viss um að Harry muni finna leið til að óska föður sínum til hamingju með afmælið eins og hann hefur alltaf gert þó sambandið milli þeirra feðga hafi verið stirt síðustu ár.
„Eins og fréttin var sett fram í The Sunday Times þá er eins og Harry sé að hunsa föður sinn með því að afþakka boð hans. En raunin er önnur,“ segir heimildarmaðurinn og staðfestir talsmaður hjónanna það að þau hafi ekki fengið boð.
