Tollgæslan, Lyfjastofnun og alþjóðadeild Ríkislögreglustjóra tóku þátt í stórri aðgerð sem skipulögð var af alþjóðalöggæslustofnuninni Interpol. Mikið magn af stinningarlyfjum voru haldlögð.
Aðgerðin heitir Pangea og er haldin í sextánda sinn, en Pangea er vísun til risameginlandsins sem var til fyrir um 250 milljón árum síðan. Þegar allt land var eitt meginland.
89 ríki tóku þátt í aðgerðinni sem stóð yfir 3. til 10. október síðastliðinn og beindist að sölu ólöglegra lyfja á netinu. Samkvæmt tilkynningum íslenskra stofnana kom upp töluverður fjöldi smærri mála hér á landi. Meðal annars var lagt hald á stera og róandi efni sem bárust til landsins með póst og hraðsendingum.
Alls var rúmlega 1300 ólöglegum sölusíðum lyfja lokað út um allan heim. Andvirði þeirra lyfja sem lagt var hald á voru 7 milljónir dollara, eða tæpur milljarður íslenskra króna. Aðgerðin leiddi til 72 handtaka og 325 nýrra rannsókna.
Athygli vekur að stærstur hluti þeirra lyfja sem haldlögð voru voru stinningarlyf. Þau voru næstum fjórðungur, eða 22 prósent. Stinningarlyf eru lyfseðilsskyld og ekki ávísað til þeirra sem eiga til dæmis við hjarta eða lifrarsjúkdóma að stríða.
Næst algengustu lyfin voru geðlyf, það er 19 prósent, en þar á eftir kynhormónar og lyf við meltingarvandamálum, 12 prósent.
Í Mósambík var hald lagt á 9 þúsund flöskur af fölsuðum hóstamixtúrum, í Ástralíu 11 þúsund fölsuðum covid-prófum og í Katar rúmlega 2 þúsund skömmtum af verkjalyfjum földum í morgunkornspakningum svo dæmi séu tekin.
