Jörð hefur skolfið við Þorbjörn, bæjarfjall Grindavíkur, og er hrina sem hófst í gærmorgun skýrt merki um kvikuhlaup. Rétt fyrir klukkan eitt í nótt varð skjálfti undir Þorbirni sem mældist 3,7 að stærð.
Kristín Jónsdóttir, deildarstjóri eldvirkni, jarðskjálfta og jarðhnika á Veðurstofunni, sagði í fréttum RÚV í gærkvöldi að kvikuhreyfingar mælist nú á 3-4 kílómetra dýpi undir Þorbirni.
„Það virðist bara vera kvika á dálítið mörgum stöðum þarna undir Reykjanesskaganum og við erum í rauninni enn þá að fylgjast með djúpri kvikusöfnun undir Fagradalsfjalli en þarna erum við komin hreinlega með kvikuinnskot á nokkra kílómetra dýpi undir Þorbirni. Þannig að það virðist vera nægt aðgengi að kviku,“ sagði Kristín í fréttum RÚV.
Veðurstofan hefur fylgst grannt með gangi mála á svæðinu og í tilkynningu sem birtist á vef Veðurstofunnar eftir hádegi í gær kom fram að engar vísbendingar væru um gosóróa en hrinan sem hófst í gærmorgun hafi verið skýrt dæmi um kvikuhlaup, það er að segja að kvika sé á hreyfingu. Nú er horft til þess hvort smáskjálftavirkni aukist nær yfirborði sem væru skýr merki um að kvika sé að brjóta sér leið í gegnum jarðskorpuna. Miðað við mælingar á hádegi í gær eru engin skýr merki um slíkt.
„Staðan getur hinsvegar breyst hratt og ekki hægt að útiloka þá sviðsmynd að kvika nái að brjóta sér leið upp í jarðskorpuna á svæðinu norðvestur af Þorbirni. Það er mikilvægt að benda á að algengast er að kvikuhreyfingar sambærilegar þeim sem sjást nú fjari út og endi ekki með eldgosi. En áður hefur verið bent á að sprunguhreyfingar vegna gikkskjálfta nærri og austan Svartsengis gætu mögulega gert kvikunni auðveldara að færast grynnra í skorpunni,“ sagði í tilkynningu Veðurstofunnar.
Fannar Jónsson, bæjarstjóri Grindavíkur, sagði við RÚV í gærkvöldi að íbúafundur verði haldinn á klukkan 17:30 morgun vegna stöðunnar. Hann segir stöðuna leggjast illa í íbúa bæjarins en þeir séu þó öllu vanir.
„Vissulega þá kemur þetta upp ótti og kvíði hjá fólki. Þetta er reyndar í fimmta skiptið sem það er landris á þessum slóðum frá 2020 og það hefur ekki orðið neitt gos í framhaldi af því en engu að síður er það alvarlegt mál, eða getur verið, að það sé kvikusöfnun þarna undir og við vitum ekki hvert hún kann að leita í framtíðinni,“ sagði Fannar í fréttum RÚV.
