Fyrsta þáttaröð Bridgerton kom á Netflix árið 2020 og sló rækilega í gegn. Þættirnir eru með þeim vinsælustu á streymisveitunni frá upphafi.
Ruby sagði í hlaðvarpsþættinum The Loaf að hún hafi tvisvar farið í geðrof á meðan tökum stóð, fyrst árið 2019 og síðan árið 2022, og að viðbrögð framleiðenda hafi verið til skammar.
„Ekki ein einasta manneskja frá Netflix eða Shondaland hefur haft samband, hringt eða sent mér skilaboð, til að athuga hvort ég sé í lagi eða hvort ég þurfi einhverja aðstoð eða stuðning. Enginn,“ sagði hún.
Leikkonan sagði að hún hafi upplifað sig mjög einmana og einangraða við tökur vegna söguþráðar persónu hennar, Marinu Thompson.
„Mér hrakaði verulega á meðan tökum stóð. Þetta var mjög kvalafullur staður fyrir mig að vera á, því persóna mín var mjög útskúfuð og ein undir þessum hræðilegu aðstæðum.“
Ruby sagði að hún hafi endað á spítala í fyrsta sinn eftir fyrstu þáttaröð af Bridgerton.
„Það var haldið þessu leyndu því að þátturinn var að koma út,“ sagði hún.
Bridgerton sló met á streymisveitunni og fann Ruby fyrir pressunni að vera í sviðsljósinu.
„Líf mitt breyttist yfir nóttu en samt fékk ég engan stuðning og hef aldrei fengið stuðning. Ég var að reyna eins og ég gæti að láta eins og allt væri í góðu lagi, að ég gæti unnið og að þetta væri ekki vandamál.“
Hvorki Netflix né Shondaland hafa brugðist við ummælum Ruby Barker.
