Fyrstu fjöldaframleiddu rafbílarnir, sem komu á götuna fyrir 11-12 árum, eru enn í fullum gangi á götunum með rafhlöður sem hafa 70-75 prósent hleðslugetu á við nýjar og jafnvel enn meira. Egill Jóhannsson, forstjóri Brimborgar, segir nýjar rafhlöður í dag mun endingarbetri en þær gömlu og endist jafnvel í 15-17 ár með a.m.k. 80 prósenta hleðslugetu. Þá sé stutt í að ekki taki lengri tíma að hlaða þær en að dæla bensíni á bíl.
Egill er gestur Ólafs Arnarsonar í hlaðvarpi Markaðarins.
Markaðurinn - Egill Jóhannsson - 1
„Þeir eru að þróa aukinn hleðsluhraða í batteríum og þeir stefna núna á að árið 2025 verði hægt að hlaða fyrir 100 mílur, sem eru 160 kílómetrar, á fimm mínútum. Þá er batterís útskiptilausnin í raun og veru orðin óþörf. Ég held að þeir stefni á þrjár mínútur árið 2028 og tvær mínútur árið 2030. Þá er þetta bara orðið eins og bensínáfylling. Þetta er ótrúlega stutt. Fimm ár eru ekki neitt í þessum bransa.“ segir Egill.
Er samt ekki líftími rafhlaðanna og kostnaður við að skipta um rafhlöður mikið áhyggjuefni í geiranum?
„Það var mjög mikil umræða um þetta, sérstaklega fyrstu árin,“ segir Egill. „Núna eru svona 10-12 ár síðan fyrstu fjöldaframleiddu rafbílarnir fóru að koma á göturnar í einhverjum mæli. Menn höfðu miklu meiri áhyggjur af endingartíma þá, hvort þetta væru bara 2-3 ár eða fimm eða eitthvað svoleiðis.
Núna sjáum við að nánast allir bílaframleiðendur eru að bjóða átta ára ábyrgð á rafhlöðunum. Þetta er ábyrgð í þeirri merkingu að ef þú getur hlaðið hana 100 prósent nýja þá á hleðslugetan ekki að vera minni en 80 prósent eftir átta ár. Þannig að hún er ekki ónýt.“
Hann bendir á að fyrstu fjöldaframleiddu rafbílarnir sem komu á götuna um 2010-11 séu enn á götunum, orðnir 12 ára gamlir. „Maður er alveg að sjá dæmi um að þeir eru kannski komnir í 70 eða 75 prósent þannig að þetta er bara fullnotaður bíll og þá er þetta orðið eins og með gamla bíla, bensín- og dísilbíla. Þeir eru seldir nýir í einhver ákveðin not. Svo kemur eigandi tvö og eigandi þrjú og eigandi fjögur og þessir síðustu eigendur eru að nota bílana bara í öðrum tilgangi.“
Egill segir að kaupendur 10-12 ára gamalla dísilbíla sú í flestum tilfellum ekki að að keyra þá 20 þúsund kílómetra á ári. „Hann er notaður kannski í veiðiferðirnar. Svona rafbílar myndu kannski vera notaðir meira í snatt. Ég, fyrir mína parta, hef engar áhyggjur af þessu lengur. Þetta eru 10-12 ára gömul batterí. Ég get alveg lofað þér því að batteríin sem verið er að framleiða núna eru jafnvel enn betri. Ég yrði ekkert hissa þó að við værum að sjá svona 15-17 ára not af batteríi.“
