Eins og DV hefur greint frá hafa verið uppi miklar hræringar innan Bandalags kennara á Norðurlandi Eystra (BKNE). Í byrjun október var formannskjöri í Bandalaginu flýtt og nýr formaður, Hanna Dóra Markúsdóttir, kosinn. Var þetta sagt gert til að koma þáverandi formanni, Helgu Dögg Sverrisdóttur kennara við Síðuskóla á Akureyri, frá en hún hafði látið ýmis ummæli falla á opinberum vettvangi um trans fólk sem vöktu deilur og óánægju.
Helga og lögmaður hennar vildu meina að kjörið bryti í bága við lög félagsins en fyrir stundu birtist færsla á Facebook-síðu BKNE þar sem lesa má bókun sem nokkrar stjórnarkonur lögðu fram á stjórnarfundi bandalagsins í dag. Þar segjast þær hafa leitað lögfræðiálits og niðurstaða þess sé sú að farið hafi verið í einu og öllu eftir lögum félagsins. Færslan hljóðar svo:
„Tilkynning stjórnar BKNE, dags., 26. október 2023
Á fundi stjórnar Bandalags kennara á Norðurlandi eystra (hér eftir BKNE) í dag, lögðu undirritaðar stjórnarkonur fram svohljóðandi bókun:
„Aðalfundur BKNE hefur æðsta vald í málum svæðafélagsins. Staðið var í einu og öllu rétt að málum lögum samkvæmt, bæði hvað varðar boðun aðalfundar, tilkynningu um lagabreytingartillögur og kosningar. Ákvarðanir sem aðalfundur BKNE samþykkti þann 5. október sl. eru því bindandi.
Stjórn BKNE fer með æðsta vald í málefnum félagsins milli aðalfunda og ber að taka ákvarðanir með hag félagsmanna að leiðarljósi í samræmi við niðurstöðu aðalfundar. Með vísan til framangreinds er Hanna Dóra Markúsdóttir rétt kjörinn formaður BKNE samkvæmt niðurstöðu aðalfundar og tekur hún við formennsku félagsins frá og með deginum í dag.“
Tilefni ofangreindrar bókunar er bréf frá lögmanni Helgu Daggar Sverrisdóttur fráfarandi formanns BKNE þar sem gerðar voru ýmsar athugasemdir við verklag í tengslum við aðalfund félagsins og á því byggt að kosning nýs formanns hafi verið ólögleg.
Undirritaðar stjórnarkonur leituðu álits lögfræðistofu sem komst að því eftir að hafa farið yfir öll gögn í málinu, að athugasemdir lögmanns Helgu Daggar standist ekki skoðun og að í einu og öllu hafi verið staðið rétt að málum samkvæmt lögum félagins, bæði hvað varðar boðun aðalfundar, tilkynningu um lagabreytingartillögur og kosningar. Ákvarðanir sem aðalfundur BKNE samþykkti þann 5. október sl. séu því bindandi og ekki hægt að efast um lögmæti þeirra.
Stjórn BKNE vonast nú til að ofangreindu máli sé lokið og að hægt verði að einbeita sér að því að efla samvinnu og samstöðu félagsmanna og vinna að bættum kjörum og starfsskilyrðum þeirra eins og hlutverk BKNE gengur út á.
Pollý Rósa Brynjólfsdóttir
Jónína Vilborg Karlsdóttir
Erla Rán Kjartansdóttir
Sigríður Sigmundsdóttir“
