Darron Gibson fyrrum miðjumaður Manchester United segist hafa átt í miklum vandræðum með svefnpillur og þær hafi nánast gengið frá honum.

Gibson sem er 35 ára gamall í dag var leikmaður United frá 2005 til 2012. Hann gekk síðan í raðir Sunderland, Everton og fleiri liða og átti nokkuð farsælan feril á Englandi.

Það var eftir að ferlinum lauk að hann fór að nota svefnlyf. „Ég var hættur að virka, ef ég skoða myndir þá er ég bara grár og myglaður. Ef ég hefði haldið áfram þá hefði ég dáið, ég var að taka 12-14 svefnpillur á kvöldi,“ segir Gibson í dag.

Í eitt skiptið var hann nær dauða en lífi. „Það var farið með mig í flýti á spítalann. Ég minntist ekkert á pillurnar, kona mín vissi af notkun minni en ekki hversu mikil hún var. Ég var góður að fela þetta.“

„Stundum tók ég þær allar í einu rétt fyrir svefn, ég sagði við hana að ég væri að sækja vatnsglas fyrir hana.“

„Ég skammast mín ekkert fyrir að ræða þetta, ég var á slæmum stað en á spítalanum ræddi ég þetta ekkert.“

Læknar reyndu að finna út úr því hvað væri að hrjá Gibson. „Þeir töluðu um flogaveiki en þetta voru töflurnar sem ég hafði tekið í mörg ár.“

„Læknirinn hringdi og lét vita að hjartað og heilinn væri í lagi.“